तालुक्याचा ‘आत्मा’च बनला मुतारी! केज तहसील कार्यालयाला घाणी अन् अतिक्रमाणाचा विळखा; जबाबदार अधिकाऱ्यांवर कारवाई कधी?

केज (विशेष बातमी):
तालुक्याचे प्रशासकीय केंद्र आणि नागरिक ज्या ठिकाणी न्याय अन् हक्कासाठी येतात, ते केज तहसील कार्यालय स्वतःच गंभीर समस्यांच्या गर्तेत सापडले आहे. संपूर्ण तालुक्याचा आत्मा मानल्या जाणाऱ्या या प्रशासकीय इमारतीला सध्या घाणीचा, बेकायदेशीर पार्किंगचा आणि अतिक्रमाणचा मोठा विळखा पडला आहे. “कोणीही यावं आणि कसाही वापर करावा,” अशी अवस्था झाल्याने तहसील कार्यालयाचे स्वरूप एखाद्या उघड्या मुतारीसारखे आणि बिनधनी पार्किंगसारखे झाले आहे.
कार्यालयाच्या सर्व बाजूंनी पसरलेली घाण, अस्वच्छता आणि उघड्यावरील हागणदारीमुळे परिसरात प्रचंड दुर्गंधी पसरली आहे. कामासाठी येणाऱ्या नागरिक, महिला आणि ज्येष्ठांना नाकावर रुमाल ठेवून फेऱ्या माराव्या लागत आहेत. नागरी सुविधांचा पूर्णपणे बोजवारा उडाला असून जनतेची “दाद कोणाकडे मागावी?” अशी अत्यंत केविलवाणी अवस्था झाली आहे.
प्रमुख समस्या आणि बिकट परिस्थिती:
घाण अन् उघडी मुतारी: स्वच्छतागृहांची दुरवस्था आणि देखभालीचा अभाव यामुळे संपूर्ण परिसर दुर्गंधीयुक्त झाला आहे.
अस्ताव्यस्त पार्किंग: वाहने कुठेही उभी केली जात असल्याने दररोज वाहतूक कोंडी आणि सामान्यांची कोंडी होत आहे.
अतिक्रमणाचा विळखा: कार्यालयाच्या सभोवताली वाढत्या अतिक्रमाणामुळे मूळ प्रशासकीय परिसराला जणू गराडा घातला गेला आहे.
नागरिकांच्या करातून चालणाऱ्या या महत्त्वाच्या प्रशासकीय इमारतीची ही दुरवस्था नक्की कोणाच्या निष्काळजीपणामुळे झाली आहे? या सर्व प्रकाराला जबाबदार कोण? प्रशासकीय अधिकारी याकडे जाणीवपूर्वक दुर्लक्ष करत आहेत का, असा संतप्त सवाल आता सामान्य जनतेतून विचारला जात आहे. वरिष्ठ अधिकाऱ्यांनी तात्काळ या प्रकरणात लक्ष घालून स्वच्छता करावी आणि अतिक्रमाण हटवून तहसीलचा दर्जा पूर्ववत करावा, अशी तीव्र मागणी जोर धरत आहे.