पोलीस तुमची, जिल्हाधिकारी तुमचेच! विरोध केला म्हणून सरपंच देशमुखांना ठेचले; पालकमंत्र्यांच्या बीडमध्ये कायदा की गुंडांचे राज्य?

बीड:-केज तालुक्यातील मस्साजोग येथील सरपंचाची अत्यंत निर्घृण आणि विदारकपणे हत्या करण्यात आल्याची धक्कादायक घटना समोर आली आहे. या घटनेमुळे संपूर्ण बीड जिल्ह्यात तीव्र संतापाची लाट उसळली असून, जिल्ह्याची वाटचाल अत्यंत धोकादायक वळणावर सुरू असल्याचे चित्र निर्माण झाले आहे.

पोस्टमॉर्टममधून धक्कादायक वास्तव समोर

सरपंचांच्या मृतदेहाचे पोस्टमॉर्टम (शवविच्छेदन) केले असता, त्यांना अत्यंत अमानुष आणि जबर मारहाण केल्याचे उघड झाले आहे. शरीरावरील जखमा आणि मारहाणीची पद्धत पाहून माणुसकीला काळीमा फासणारे कृत्य गुन्हेगारांनी केल्याचे स्पष्ट होत आहे. या क्रूरतेमुळे नागरिकांमधून “माणूस म्हणून जन्म घेण्यापेक्षा जनावराच्या पोटी जन्म घेतला असता तर बरे झाले असते,” अशी अत्यंत वेदनादायी आणि उद्विग्न प्रतिक्रिया उमटत आहे.

गुन्हेगारांचे वय ३० च्या आत; पडद्यामागचे सूत्रधार कोण?

या संपूर्ण प्रकरणात धक्कादायक बाब म्हणजे सर्व आरोपी हे ३० वर्षांच्या आतील तरुण आहेत. जाती-पातीच्या राजकारणात अडकवून या तरुणांचे माथे भडकवले गेले आणि त्यांना गुन्हेगारीच्या खाईत लोटण्यात आले, असा आरोप होत आहे.

गुन्हेगारांना कोणत्याही जातीचे लेबल नसले, तरी त्यांना पाठीशी घालणारे आणि सहकार्य करणारे खरे गुन्हेगार आहेत. याच तरुणांचा वापर करून ‘अवदा’ कंपनीकडे खंडणी मागण्यात आल्याचेही समोर आले असून, या प्रकरणी वाल्मिक अण्णा यांच्यावर खंडणीचा गुन्हा दाखल झाला आहे. तर दुसरीकडे, हत्या प्रकरणात गुन्हेगारांना सहकार्य केल्याच्या आरोपावरून विष्णू चाटे यांच्यावर सह-आरोपी म्हणून गुन्हा दाखल करण्यात आला आहे.

पालकमंत्री धनंजय मुंडे यांच्यावर थेट निशाणा

या हत्येनंतर बीड जिल्ह्यातील राजकीय आणि सामाजिक वातावरण पूर्णपणे ढवळून निघाले असून, थेट राज्याचे मंत्री तथा बीडचे पालकमंत्री धनंजय मुंडे यांच्या कार्यपद्धतीवर गंभीर सवाल उपस्थित केले जात आहेत.

“दिवंगत नेते पंडित अण्णा मुंडे आणि लोकनेते गोपीनाथराव मुंडे साहेबांचे नाव अशा गुन्हेगारांना सांभाळून धुळीस मिळवले आहे. वडिलांचे आणि राजकीय गुरू असलेल्या चुलत्यांचे नाव देशात घालवण्याचे काम सुरू आहे,” अशा शब्दांत विरोधक आणि सर्वसामान्य जनतेतून संताप व्यक्त केला जात आहे.

यंत्रणांवर मंत्र्यांचेच नियंत्रण असल्याचा आरोप

जिल्ह्यात वाढलेल्या गुंडगिरीवर बोलताना नागरिकांनी प्रशासकीय यंत्रणेच्या लाचारतेवरही बोट ठेवले आहे. आमदार, मंत्री, पालकमंत्री सर्वकाही एकच असल्याने पोलीस यंत्रणा, जिल्हाधिकारी आणि पोलीस अधीक्षक हे केवळ दबावाखाली काम करत असल्याचा आरोप होत आहे. तसेच अनेक मराठा नेतेही या सत्तेचे गुलाम बनल्याची टीका केली जात आहे.

“आम्हालाही ठेचून काढा…” जनतेचा उद्वेग

“बीड जिल्ह्यात इतका माजोरडेपणा आला कुठून?” असा संतप्त सवाल करत, इमानदारीने जगणाऱ्या आणि सत्य बोलणाऱ्यांचा आवाज दाबला जात असल्याची भावना निर्माण झाली आहे. विरोध करणाऱ्या सरपंच देशमुखांना ज्याप्रमाणे ठेचून मारले, त्याचप्रमाणे आता गोरगरीब जनता आणि सत्य बोलणाऱ्यांनाही ठेचून काढणार का? अशी उपरोधिक आणि उद्विग्न विचारणा थेट मंत्र्यांकडे केली जात आहे.

या प्रकरणाचे कोर्टात काय होईल ते होईल, मात्र बीड जिल्ह्यातील या वाढत्या गुन्हेगारीमुळे आणि दहशतीमुळे गोरगरीब जनता आता कोणाच्या आधारावर जगणार, हा मोठा प्रश्न निर्माण झाला आहे.