नव्या शासकीय इमारती वापरात आणा, अन्यथा निराधार लोकांसाठी ताबा देणार; ‘केज विकास संघर्ष समिती’ व ‘हास्य क्लब’चा प्रशासनाला थेट इशारा!

केज:- केज (जि. बीड):
केज शहरातील नागरी सुविधा आणि प्रलंबित विकासकामांच्या प्रश्नावर प्रशासन दुर्लक्ष करत असल्याचा आरोप करत ‘केज विकास संघर्ष समिती’ च्या वतीने बेमुदत आमरण उपोषण सुरू करण्यात आले आहे. शहरातील मूलभूत गरजा आणि सर्वसामान्य नागरिकांचे प्रश्न मार्गी लागेपर्यंत आंदोलन मागे घेणार नाही, असा ठाम निर्धार आंदोलकांनी व्यक्त केला आहे.
शासकीय इमारतींबाबत प्रशासनाला इशारा:
पंचायत समितीच्या आवारात धूळ खात पडलेल्या नव्या इमारती तात्काळ दुरुस्त करून त्या वापरात आणाव्यात, अशी जोरदार मागणी करण्यात आली आहे. जर प्रशासनाने यावर त्वरित कारवाई केली नाही, तर केज विकास संघर्ष समिती आणि हास्य क्लबच्या वतीने या शासकीय इमारतींचा ताबा घेऊन तेथे निराधार लोकांना राहण्यासाठी जागा देणार, असा थेट व कडक इशारा आंदोलकांनी दिला आहे.
आंदोलनातील इतर प्रमुख मागण्या:
एसटी बस डेपोचे काम: केज येथे बस डेपोसाठी मंजूर निधीतून बांधकामास तात्काळ सुरुवात करण्यात यावी.
बायपास (रिंग रोड) मंजुरी: केज शहरातील वाहतूक कोंडी टाळण्यासाठी पर्यायी रिंग रोड तात्काळ मंजूर करावा.
छोटे व्यापारी व टपरीधारकांचे पुनर्वसन: लहान व्यापारी आणि टपरीधारकांसाठी तात्काळ जागा उपलब्ध करून द्यावी.
स्मशानभूमीत सुविधा: शहरातील दोन्ही स्मशानभूमींमध्ये अत्यावश्यक नागरी सुविधा पुरवण्यात याव्यात.
शासकीय योजनांचा लाभ: गोरगरीब नागरिकांना विविध शासकीय योजनांचे लाभ वेळेवर वितरित करण्यात यावेत.
लाडकी बहीण योजना KYC मुदतवाढ: ‘मुख्यमंत्री माझी लाडकी बहीण’ योजनेच्या ई-केवायसी (e-KYC) प्रक्रियेसाठी मुदत वाढवून मिळावी.
प्रशासकीय दिरंगाईमुळे केजकरांना नाहक त्रास सहन करावा लागत आहे. त्यामुळे जोपर्यंत संबंधित अधिकारी लेखी आश्वासन देत नाहीत, तोपर्यंत हे आंदोलन सुरुच राहील, असा इशारा देण्यात आला आहे. या आंदोलनाला स्थानिक नागरिक व विविध संघटनांचा मोठा पाठिंबा मिळत आहे.