“बीडचे पोलीस अधीक्षक नवनीत कांवत यांच्या आयपीएस केडर वाटपावर शिक्कामोर्तब; महाराष्ट्राला मिळाले ११ नवे आयपीएस अधिकारी!”

बीडचे पोलीस अधीक्षक नवनीत कांवत यांच्यासह UPSC २०१६ तुकडीच्या आयपीएस अधिकाऱ्यांचे केडर वाटप जाहीर; महाराष्ट्राला मिळाले ११ नवे अधिकारी
बीड / नवी दिल्ली (विशेष प्रतिनिधी):
केंद्रीय गृह मंत्रालयाच्या वतीने नागरी सेवा परीक्षा २०१६ मधील यशस्वी १५० भारतीय पोलिस सेवा (IPS) अधिकाऱ्यांच्या अधिकृत केडर वाटपाची अधिसूचना जारी करण्यात आली आहे. या यादीत १२९ व्या क्रमांकावर असलेले राजस्थानचे सुपुत्र आणि सध्या बीड जिल्ह्याचे पोलीस अधीक्षक म्हणून कार्यरत असलेले नवनीत कुमार कांवत  यांना ‘महाराष्ट्र केडर’ वाटप करण्यात आले आहे.
गृह मंत्रालयाने ‘आयपीएस संवर्ग नियम १९५४’ मधील नियमांनुसार देशातील एकूण १५० उमेदवारांची राज्य संवर्गनिहाय यादी निश्चित केली आहे. यामध्ये महाराष्ट्राला नवनीत कुमार कांवत यांच्यासह एकूण ११ नवे आयपीएस अधिकारी मिळाले आहेत.
महाराष्ट्राला मिळालेले प्रमुख अधिकारी:
महाराष्ट्रात सेवेसाठी वाटप झालेल्या अधिकाऱ्यांमध्ये नवनीत कुमार कांवत यांच्याव्यतिरिक्त आदित्यविक्रम हिरानी (रँक ११३), ऐश्वर्या शर्मा (रँक १६८), अनुज तारे (रँक १८९), वाकुल जिंदल (रँक १९५), अनुराग जैन (रँक १९८), गोरख भामरे (रँक ५९०), एम. रमेश (रँक ५९७), कुमार चिंता (रँक ६०८), नितीन बागटे (रँक ६७३) आणि अंकित (रँक ७१५) या अधिकाऱ्यांचा समावेश आहे.
केंद्रीय गृह मंत्रालयाचे उपसचिव एस. के. रस्तोगी यांच्या स्वाक्षरीने ही अधिसूचना जारी करण्यात आली असून, सर्व राज्य सरकारे, यूपीएससी आणि हैदराबाद येथील सरदार वल्लभभाई पटेल राष्ट्रीय पोलिस अकादमीला यासंदर्भातील प्रत पाठवण्यात आली आहे.