मराठवाड्यातील बालवक्त्यांची वैचारिक क्रांती; स्व. विश्वंभर काका कोकिळ वक्तृत्व स्पर्धेत आवनी गिते व आरोही धोतरे चमकल्या!

स्व. विश्वंभर (काका) कोकिळ यांच्या ९ व्या पुण्यस्मरणार्थ मराठवाडा पातळीवरील भव्य शालेय वक्तृत्व स्पर्धा उत्साहात संपन्न
आवनी गिते आणि आरोही धोतरे यांनी पटकावला प्रथम क्रमांक; २७ शाळांचा उत्स्फूर्त सहभाग
केज :-जीवन विकास शिक्षण मंडळ, केज आणि कोकिळ परिवार यांच्या संयुक्त विद्यमाने संस्थेचे संस्थापक सचिव स्व. विश्वंभर (काका) कोकिळ यांच्या ९ व्या पुण्यस्मरणार्थ मराठवाडा पातळीवरील भव्य शालेय वक्तृत्व स्पर्धेचे आयोजन स्वामी विवेकानंद विद्यामंदिर (माध्यमिक विभाग), केज येथे करण्यात आले होते. या चुरशीच्या स्पर्धेत लहान गटातून आदर्श प्राथमिक विद्यालय घाटनांदुरची विद्यार्थिनी आवनी सूर्यकांत गिते, तर मोठ्या गटातून जनता माध्यमिक विद्यालय धारूरची विद्यार्थिनी आरोही बालासाहेब धोतरे हिने प्रथम क्रमांक पटकावला.
कार्यक्रमाचे उद्घाटन मान्यवरांच्या हस्ते प्रतिमा पूजन व दीपप्रज्वलनाने झाले. संस्थेचे अध्यक्ष तथा कृषी उत्पन्न बाजार समितीचे सभापती अंकुशराव इंगळे यांनी कार्यक्रमाचे अध्यक्षस्थान भूषविले. प्रमुख पाहुणे म्हणून ज्ञानदीप प्राथमिक विद्यालयाचे अध्यक्ष तथा दैनिक लोकमतचे पत्रकार अनिल महाजन उपस्थित होते.
संस्थेचे सचिव जी. बी. गदळे यांनी प्रास्ताविकात संस्थेच्या वाटचालीचा पट मांडताना सांगितले की, “स्व. विश्वंभर कोकिळ व केशवराव नाळवंडीकर गुरुजी यांनी केज परिसरातील वंचित घटकांसाठी वसतिगृहे उभारून १९८४ मध्ये शिक्षण मंडळाची स्थापना केली. गुणवत्तेच्या बळावरच नुकत्याच लागलेल्या दहावीच्या परीक्षेत छत्रपती संभाजीनगर विभागातून शाळेच्या ४ विद्यार्थ्यांनी १०० पैकी १०० गुण मिळवले आहेत.”
प्रमुख वक्ते अनिल महाजन यांनी आपल्या भाषणात, “विश्वंभर काकांनी ऊसतोड कामगारांच्या मुलांसाठी शाळा उभारून समाजाला घडवण्याचे कार्य केले. आजच्या स्पर्धात्मक युगात केवळ पुस्तकी ज्ञान पुरेसे नसून वक्तृत्वासारख्या स्पर्धांमधूनच भावी नेतृत्व घडते,” असे प्रतिपादन केले. अध्यक्षीय समारोपात अंकुशराव इंगळे यांनी विश्वंभर काकांच्या शिस्तीचा आणि शिक्षकांच्या त्यागाचा गौरव केला.
स्पर्धेत मराठवाड्यातील २७ शाळांनी सहभाग नोंदवला होता.
स्पर्धेचा सविस्तर निकाल
लहान गट (इयत्ता ५ वी ते ७ वी) — विषय: ‘कृत्रिम बुद्धिमत्ता: संधी व आव्हाने’
प्रथम: आवनी सूर्यकांत गिते (आदर्श प्रा. वि., घाटनांदुर)
द्वितीय: आरोही अभिजीत वडगावकर (स्वामी विवेकानंद विद्या मंदिर, केज)
तृतीय: गौरी नवनाथ कांबळे (अभिनव पाटील स्कूल)
उत्तेजनार्थ: समृद्धी प्रदीप जाधवर (खोलेश्वर मा. वि., अंबाजोगाई)
मोठा गट (इयत्ता ८ वी ते १० वी) — विषय: ‘परीक्षा पेपरफुटी: विद्यार्थ्यांच्या भविष्याशी खेळ’
प्रथम: आरोही बालासाहेब धोतरे (जनता मा. वि., धारूर)
द्वितीय: अर्णव दत्तप्रसादजी सारडा (श्री लक्ष्मेश्वर वि., घाटनांदुर)
तृतीय: नंदिनी सुरेश जगताप (जयभवानी वि., लोखंडी सावरगाव)
उत्तेजनार्थ: श्रावणी महेश साबळे (श्रीम. गोदावरी कुंकूलोळ योगेश्वरी कन्या शाळा, अंबाजोगाई)
बक्षीस वितरण सत्राच्या अध्यक्षस्थानी सेवानिवृत्त शिक्षक हनुमंत घाडगे होते, तर प्रमुख पाहुणे म्हणून माजी सैनिक तथा साहित्यिक जनार्धन सोनवणे उपस्थित होते. याप्रसंगी परीक्षक प्रा. डॉ. हनुमंत सौदागर, प्रा. बाबासाहेब हिरवे, हनुमंत घाडगे, बाबासाहेब शिनगारे, जनार्दन सोनवणे, प्रा. विठ्ठल समुद्रे व अमोल गुळवे यांनी विद्यार्थ्यांना मार्गदर्शन केले.
या कार्यक्रमास संस्थेचे सहसचिव उपेंद्र कोकिळ, संचालक नारायण अंधारे, प्रा. सिद्धेश्वर वायबसे, प्राचार्य शंकर भैरट, मुख्याध्यापक अविनाश कराड, वसंत शितोळे, अशोक सोनवणे यांच्यासह शिक्षक व पालक मोठ्या संख्येने उपस्थित होते.
निकालाचे वाचन मेघशाम मंगरूळकर यांनी केले. कार्यक्रमाचे प्रभावी सूत्रसंचालन सांस्कृतिक विभाग प्रमुख प्रबोधकांत समुद्रे यांनी केले, तर आभार मुख्याध्यापिका शिवनंदा मुळे यांनी मानले.