शाळेत सेवा करतानाच निरोप घेतला: पाण्याचा पाईप टाकीत सोडताना विजेची तार बनली काळ; शिक्षकाच्या दुर्दैवी निधनाने अश्रूंचा बांध फुटला

हृदयद्रावक: केज येथे विजेचा धक्का लागून आदर्श शिक्षक मुबशिरोद्दीन इनामदार यांचे निधन; शैक्षणिक क्षेत्रावर शोककळा

केज:-केज येथील जिल्हा परिषद उर्दू प्राथमिक शाळेचे सहशिक्षक मुबशिरोद्दीन अमिनोद्दीन इनामदार (वय ५१ वर्षे) यांचा विजेचा तीव्र धक्का लागून दुर्दैवी मृत्यू झाला. आज सकाळी साडेअकरा वाजण्याच्या सुमारास घडलेल्या या हृदयद्रावक घटनेमुळे संपूर्ण केज शहरासह शैक्षणिक विश्वात तीव्र हळहळ व्यक्त होत आहे.

मिळालेल्या माहितीनुसार, जिल्हा परिषद उर्दू कन्या प्राथमिक शाळा, रोजा मोहल्ला येथे विद्यार्थ्यांसाठी पिण्याच्या पाण्याच्या टँकरचा पाईप छतावरील पाण्याच्या टाकीत सोडत असताना मुबशिर सरांचा विजेच्या जिवंत तारेला अचानक स्पर्श झाला. विजेचा जोरदार धक्का बसल्याने ते जागीच खाली कोसळले. त्यांना तातडीने केज येथील उपजिल्हा रुग्णालयात दाखल करण्यात आले; मात्र उपचारापूर्वीच त्यांचा मृत्यू झाल्याचे डॉक्टरांनी घोषित केले.

मुलीच्या लग्नाआधीच काळाचा घाला

मुबशिर सर हे अत्यंत शांत, मनमिळाऊ आणि प्रेमळ स्वभावाचे शिक्षक म्हणून ओळखले जात होते. सामाजिक व शैक्षणिक कार्यात त्यांचा नेहमीच पुढाकार असायचा. त्यांच्या पश्चात पत्नी, तीन मुली, दोन मुले आणि दोन भाऊ असा मोठा परिवार आहे. त्यांच्या एका मुलीचा नुकताच साखरपुडा (रसम) झाला असून लवकरच तिचा विवाह होणार होता. घरात लग्नकार्याची तयारी सुरू असतानाच मुबशिर सरांवर काळाने घाला घातल्याने इनामदार कुटुंबीयांवर दुःखाचा डोंगर कोसळला आहे. ते हारुणभाई इनामदार यांचे मेहुणे (बहिणीचे पती) होत.

त्यांच्या अकाली जाण्याने शिक्षक वर्ग, नातेवाईक व मित्र परिवारावर शोककळा पसरली आहे. आज संध्याकाळी नमाजपठणानंतर त्यांच्या पार्थिवावर दफनविधी केला जाईल. एका कर्तृत्ववान व संवेदनशील शिक्षकाच्या निधनाने केज शहरातून हळहळ व्यक्त केली जात असून नागरिकांकडून त्यांना भावपूर्ण श्रद्धांजली अर्पण करण्यात येत आहे.