वादाची ठिणगी विझली, विकासाची मशाल पेटली! साळेगाव-माळेगावच्या सिमेवर उभा राहणार महामार्गाचा तुतारी इंटरचेंज!

केज / प्रतिनिधी (क्रांतीसूर्य न्यूज नेटवर्क):राज्य शासनाने मंजुरी दिलेल्या अत्यंत महत्त्वाकांक्षी ‘कल्याण-लातूर जनकल्याण द्रुतगती महामार्गा’च्या संरेखनावरून  आणि इंटरचेंजवरून बीड व धाराशिव जिल्ह्यात निर्माण झालेला संघर्ष अखेर संपुष्टात आला आहे. सरकारने दोन्ही जिल्ह्यांचे हित लक्षात घेत अत्यंत योग्य असा ‘सुवर्णमध्य’ काढला असून, या महामार्गावरील अत्यंत महत्त्वाचा आणि भव्य मध्यवर्ती जोडमार्ग (इंटरचेंज) केज तालुक्यातील साळेगाव आणि माळेगाव यांच्या मध्यवर्ती भागातून नेण्याचा महत्त्वपूर्ण निर्णय घेतला आहे.

या ऐतिहासिक निर्णयामुळे संपूर्ण केज तालुक्याला विकासाचा मोठा केंद्रबिंदू मानले जात असून, धाराशिव आणि बीड जिल्ह्यांच्या सीमाभागातील दळणवळणाला नवी दिशा मिळणार आहे.

शासनाचा सुवर्णमध्य: दोन्ही बाजूंना समान न्याय

महामार्गाच्या प्रवेश-निर्गमन मार्गावरून बीड आणि धाराशिव या दोन्ही जिल्ह्यांतील लोकप्रतिनिधी व नागरिकांमध्ये गेल्या काही दिवसांपासून रस्सीखेच सुरू होती. मात्र, प्रशासनाने भौगोलिक रचना आणि दोन्ही बाजूंची सोय लक्षात घेऊन साळेगाव-माळेगाव शिवेच्या दरम्यान हा इंटरचेंज निश्चित केला आहे.

 हा नियोजित मध्यवर्ती जोडमार्ग केज शहरापासून अवघ्या ९ किलोमीटर अंतरावर असेल.

 त्याचप्रमाणे धाराशिव जिल्ह्यातील कळंब शहरापासूनही हा जोडमार्ग अवघ्या ९ किलोमीटर अंतरावर राहणार आहे.

दोन्ही प्रमुख शहरांपासून समान (९ किमी) अंतरावर हा जोडमार्ग आल्याने वादावर पडदा पडला असून दोन्ही जिल्ह्यांतील नागरिकांमध्ये समाधानाचे वातावरण आहे.

धाराशिव जिल्ह्यातील गावांना प्रचंड मोठा फायदा

साळेगाव-माळेगाव येथील या मध्यवर्ती जोडमार्गामुळे केवळ केजच नव्हे, तर धाराशिव जिल्ह्यातील अनेक महत्त्वाच्या शहरांना मुंबई-कल्याण द्रुतगती मार्गाचा थेट व गतिमान लाभ मिळणार आहे.

 कळंब, वाशी, शिराढोण, ढोकी या भागांतील वाहनांना महामार्गावर चढण्या-उतरण्यासाठी हा सर्वांत सोयीस्कर आणि जवळचा मार्ग ठरणार आहे.

 धाराशिव ते कल्याण दरम्यानचे अंतर सुमारे ८० किलोमीटरने कमी होणार असल्याने या भागातील प्रवाशांचा वेळ, इंधन आणि पैशांची प्रचंड मोठी बचत होणार आहे.

संपूर्ण केज तालुक्यासाठी ठरणार ‘सुवर्णसंधी’

हा महामार्ग आणि साळेगाव-माळेगाव येथील जोडमार्ग संपूर्ण केज तालुक्यासाठी आर्थिक व औद्योगिक संजीवनी ठरणार आहे:

१. कृषी क्रांतीला चालना: केज परिसरातील नगदी पिके, भाजीपाला, फळे आणि दूध थेट कल्याण-मुंबईच्या बाजारपेठेत अवघ्या ४ ते ५ तासांत ताजी पोहोचवता येतील.

२. व्यापार आणि उद्योग विस्तार: साळेगाव-माळेगाव व केज परिसरामध्ये महामार्गालगत गोदामे, कोल्ड स्टोअरेज, ऑटोमोबाईल हब्स, हॉटेल्स आणि लॉजिस्टिक पार्क मोठ्या प्रमाणावर उभे राहतील.

३. स्थानिक तरुणांना रोजगार: महामार्गाच्या कामापासून ते विविध सेवा क्षेत्रांपर्यंत केज तालुक्यातील स्थानिक तरुणांसाठी मोठ्या प्रमाणावर रोजगाराच्या नव्या संधी उपलब्ध होणार आहेत.

४. जमिनींना सुवर्णमूल्य: या मध्यवर्ती जोडमार्गामुळे केज-कळंब परिसरातील परिसराचा झपाट्याने विकास होणार असून ग्रामीण अर्थकारणाला मोठी गती मिळेल

अत्याधुनिक ‘तुतारी आकार’ (Trumpet) रचनेचा जोडमार्ग

साळेगाव-माळेगावच्या मध्यभागी उभारला जाणारा हा जोडमार्ग अत्याधुनिक तुतारी प्रकारच्या  रचनेचा असणार आहे. त्यामुळे मुख्य महामार्गावरील वेगवान वाहतुकीला कोणताही अडथळा न होता वाहने सुरक्षितपणे महामार्गावर प्रवेश करू शकतील व बाहेर पडू शकतील.

साळेगाव-माळेगाव येथील हा मध्यवर्ती जोडमार्ग केज तालुक्याला पश्चिम महाराष्ट्र आणि मुंबईशी जोडणारा भक्कम ‘प्रवेशद्वार’ ठरला असून, विकासाच्या नकाशावर केज आता अग्रस्थानी झळकणार आहे.