सोनीजवळा येथे प्रलंबित जागांचे मोजमाप पूर्ण; सरपंच सौ. जानवी गोविंद ससाणे यांच्या पुढाकाराने गावकऱ्यांना लवकरच मिळणार ‘स्मार्ट प्रॉपर्टी कार्ड’

केज:- सोनीजवळा येथील ज्या गावकऱ्यांचे पीटीआर (PTR) उपलब्ध नव्हते किंवा संपूर्ण ग्रामपंचायत जळालेली असल्यामुळे रेकॉर्डमध्ये त्रुटी होत्या, अशा सर्व जागांचा प्रश्न अखेर निकाली निघाला आहे. सर्व प्रलंबित जागांचे जागामालकांसमोर प्रत्यक्ष मोजमाप पूर्ण झाले आहे.
या कामासाठी शासनाने सर्वेअर म्हणून नियुक्त केलेले श्री. तानाजी खुणे साहेब यांनी सलग सहा महिने प्रत्यक्ष जागेवर जाऊन घरांचे मोजमाप घेतले आणि ‘नमुना नंबर ८ अ’ तयार केला. हे सर्व अद्यावत रेकॉर्ड आता ‘भूमी अभिलेख कार्यालय, केज’ यांच्याकडे सुपूर्द करण्यात आले आहे. गावची ड्रोनद्वारे हद्द मोजणी देखील पूर्ण झाली असून, या रेकॉर्डच्या आधारे आता गावकऱ्यांना जागांच्या मालकी हक्काचे ‘स्मार्ट प्रॉपर्टी कार्ड’ मिळणार आहे.
प्रॉपर्टी कार्डचे महत्त्व आणि फायदे:
गावकऱ्यांच्या दृष्टीने हे प्रॉपर्टी कार्ड अत्यंत महत्त्वाचे ठरणार आहे, कारण:
मालकी हक्काचा कायदेशीर पुरावा: या कार्डमुळे प्रत्येक गावकऱ्याला आपल्या जागेचा अधिकृत आणि कायदेशीर मालकी हक्क प्राप्त होईल.
कर्ज मिळणे सोपे: बँकेकडून घर किंवा जागेवर कर्ज (Loan) हवे असल्यास हे प्रॉपर्टी कार्ड महत्त्वाचा दस्तऐवज म्हणून काम करेल.
जागेचे अचूक क्षेत्रफळ: ड्रोन आणि सर्वेअर द्वारे मोजणी झाल्यामुळे जागेच्या सीमा आणि क्षेत्रफळ अधिकृतपणे नोंदवले गेले आहे, ज्यामुळे भविष्यात जागेचे वाद होणार नाहीत.
खरेदी-विक्रीत पारदर्शकता: भविष्यात जागा किंवा घराची खरेदी-विक्री करताना कोणतीही अडचण येणार नाही.
हा प्रश्न मार्गी लावण्यासाठी सरपंच सौ. जानवी गोविंद ससाणे, तात्कालीन ग्रामसेवक वरपे साहेब, कविता मॅडम सौ.स्वाती कोकाटे,गंगा मुकुंद गायकवाड, मिनाज पठाण सर (संचालक, अंबाजोगाई साखर कारखाना), सौ. जयश्रीताई वसेकर, प्रताप अशोक वैरागे, सौ. शीला प्रकाश जोगदंड, देविदास सोपान जोगदंड, कल्याण साला पवार, हुसेना जब्बार शेख, महादू वसेकर आणि संपूर्ण सोनिजवळा गावकऱ्यांनी सामूहिक प्रयत्न केले.
आवाहन:
ज्या गावकऱ्यांनी अद्याप नोंदणी केलेली नाही, त्यांनी तातडीने ग्रामसेवकांकडे नोंदणी करावी, जेणेकरून त्यांचे रेकॉर्ड भूमी अभिलेख कार्यालयाकडे वर्ग करता येईल आणि ते या महत्त्वाच्या योजनेपासून वंचित राहणार नाहीत, असे आवाहन सरपंच सौ. जानवी गोविंद ससाणे यांनी केले आहे.