केज उपजिल्हा रुग्णालयाची उल्लेखनीय कामगिरी; ३५ बालकांवर यशस्वी शस्त्रक्रिया

केज उपजिल्हा रुग्णालयात ३५ बालकांवर ‘टंग टाई’ शस्त्रक्रिया यशस्वी; लोकप्रतिनिधींकडून वैद्यकीय टीमचा गौरव
केज:
ग्रामीण भागातील सर्वसामान्य रुग्णांसाठी वरदान ठरत असलेल्या केज येथील उपजिल्हा रुग्णालयात राष्ट्रीय बाल स्वास्थ्य कार्यक्रमांतर्गत ३५ शालेय विद्यार्थ्यांवर ‘टंग टाई’ (Tongue-tie) शस्त्रक्रिया यशस्वीरीत्या पार पडल्या. या उल्लेखनीय कामगिरीबद्दल स्थानिक लोकप्रतिनिधी, सामाजिक कार्यकर्ते आणि पदाधिकाऱ्यांच्या वतीने वैद्यकीय अधिकारी व सर्व कर्मचाऱ्यांचा सत्कार करून त्यांचे कौतुक करण्यात आले.
तत्कालीन आरोग्यमंत्री दिवंगत डॉ. विमलताई मुंदडा यांच्या दूरदृष्टीतून साकारलेले हे उपजिल्हा रुग्णालय आज आधुनिक वैद्यकीय सेवांच्या जोरावर बीड जिल्ह्यासह शेजारील तालुक्यातील रुग्णांसाठी संजीवनी ठरत आहे.
एकाच महिन्यात १५ हजारांहून अधिक रुग्णांवर उपचार
उपजिल्हा रुग्णालयात सीटी स्कॅन, डायलिसिस, डिजिटल एक्स-रे, ईसीजी, २४ तास रक्तपेढी यांसारख्या अद्ययावत सुविधा अल्पदरात व मोफत उपलब्ध असल्याने रुग्णांचा ओघ वाढला आहे. गेल्या एका महिन्यातील आरोग्य सेवेची आकडेवारी:
बाह्यरुग्ण विभाग (OPD): १५,३३५ रुग्ण तपासणी
हाडांच्या शस्त्रक्रिया: ९३
डोळ्यांच्या शस्त्रक्रिया: २३
प्रसूती सेवा: ५७ सामान्य (नॉर्मल) आणि १९ सिझर बाळंतपणे
स्त्री नसबंदी शस्त्रक्रिया: १६
सीटी स्कॅन (CT Scan): ४६० रुग्ण
डायलिसिस सेवा: १२ नियमित रुग्ण
एक्स-रे व ईसीजी: १,५२८ एक्स-रे आणि ५९८ ईसीजी तपासण्या
वैद्यकीय टीमचे समर्पण व नागरिकांचे समाधान
प्रभारी वैद्यकीय अधीक्षक डॉ. केशव इंगोले आणि डॉ. चंद्रकांत चव्हाण यांच्या मार्गदर्शनाखाली सर्व वैद्यकीय अधिकारी व परिचारक वर्ग अहोरात्र सेवा देत आहेत. या यशस्वी कामगिरीबद्दल डॉ. दिगंबर मुंडे, डॉ. भाऊसाहेब चाळक, डॉ. बालासाहेब सावंत, डॉ. निवृत्ती मुंडे, डॉ. कृष्णा म्हेत्रे, डॉ. समाधान घुगे, डॉ. अजय पाटील, डॉ. फिजा, डॉ. स्वप्नील घोलप, डॉ. प्रतीक्षा काळे, डॉ. हजारे, डॉ. हुसेन सुलतान, डॉ. टेकाळे मॅडम, डॉ. तेजस थोरात, डॉ. पवार, डॉ. पुसदेकर, डॉ. मुळे, डॉ. वरोडे, डॉ. मोराळे, डॉ. शेटे मॅडम, डॉ. डोईफोडे मॅडम, डॉ. बडे मॅडम, डॉ. वाघमारे मॅडम, डॉ. अरुणा मुंडे मॅडम, डॉ. हुमेरा मॅडम, श्रीकृष्ण नागरगोजे, बालासाहेब सानप व संपूर्ण सपोर्ट स्टाफचे विशेष कौतुक करण्यात आले.
लोकप्रतिनिधींकडून सन्मान व शुभेच्छा
कार्यक्रमाप्रसंगी सभापती अंकुशराव इंगळे, उपसभापती डॉ. वासुदेव नेहरकर, जि.प. सदस्या डॉ. योगिनी थोरात, व्यापारी महासंघाचे अध्यक्ष महादेव सूर्यवंशी, ज्येष्ठ पत्रकार विनोद शिंदे, प्रकाश मुंडे, भाजप अल्पसंख्याक सेलचे अध्यक्ष खदीर कुरेशी, प्रेमजीत हजारे, युवा नेते श्रीमंत चटप, सत्वधर यांच्यासह मान्यवरांनी रुग्णालयाच्या संपूर्ण टीमचा सत्कार केला आणि भविष्यातही अशीच तत्पर व दर्जेदार रुग्णसेवा सुरू ठेवण्याची अपेक्षा व्यक्त केली.