स्वप्नपूर्ती! बीडकरांची ऐतिहासिक प्रतीक्षा संपली; सर्वपक्षीय एकजुटीतून रेल्वेचे स्वप्न अखेर साकार

अखेर बीडकरांचे रेल्वेचे स्वप्न साकार: अनेक दशकांच्या संघर्षाला यश; जिल्ह्यातील सर्वपक्षीय नेतृत्वासह जनतेचे मानले आभार

विशेष वृत्त / बीड:-अनेक दशकांपासून बीड जिल्ह्याला विकासाच्या मुख्य प्रवाहात आणण्यासाठी पाहिलेले ‘बीड रेल्वे’चे स्वप्न अखेर पूर्ण झाले आहे. मराठवाड्यातील अत्यंत बहुप्रतिक्षित अशा अहमदनगर–बीड–परळी या रेल्वेमार्गावर प्रत्यक्ष गाडी धावण्याचा क्षण जवळ आल्याने संपूर्ण जिल्ह्यात उत्साहाचे आणि आनंदाचे वातावरण निर्माण झाले आहे. या ऐतिहासिक टप्प्यामुळे जिल्ह्याच्या दळणवळणाला गती मिळणार असून उद्योग, व्यापार आणि रोजगाराच्या नव्या संधी खुल्या होणार आहेत.
अनेक दशकांचा राजकीय लढा आणि पाठपुरावा
बीड जिल्ह्याला रेल्वे मिळावी म्हणून गेल्या तीन-चार दशकांत अनेक राजकीय नेत्यांनी पक्षभेद विसरून संसदेपासून रस्त्यापर्यंत संघर्ष केला. या स्वप्नाची मुहूर्तमेढ रोवण्यापासून ते प्रकल्पाला प्रत्यक्षात आणण्यापर्यंतच्या प्रक्रियेत अनेक दिग्गजांचे योगदान राहिले आहे:
स्व. केशरकाकू क्षीरसागर: बीडच्या पहिल्या महिला खासदार म्हणून त्यांनी संसदेत सर्वप्रथम बीड रेल्वेचा प्रश्न ठामपणे मांडला आणि या प्रकल्पाची पायाभरणी करण्याच्या प्रयत्नांना सुरुवात केली.
रजनीताई पाटील: खासदार म्हणून त्यांनी केंद्रात हा विषय सातत्याने लावून धरला आणि अर्थसंकल्पीय तरतुदींसाठी पाठपुरावा केला.
जयसिंगराव गायकवाड: माजी खासदार जयसिंगराव गायकवाड यांनी या प्रकल्पाला गती मिळवून देण्यासाठी संसदेत वारंवार आवाज उठवला.
स्व. गोपीनाथराव मुंडे: या रेल्वे मार्गाला गती देण्यात लोकनेते स्व. गोपीनाथराव मुंडे यांचे योगदान अनन्यसाधारण ठरले. केंद्रात ५०% वाटा केंद्र सरकार आणि ५०% वाटा राज्य सरकार अशा मॉडेलला मंजुरी मिळवून देण्यात आणि निधी मंजूर करून घेण्यात त्यांची भूमिका निर्णायक ठरली.
डॉ. प्रीतमताई मुंडे: खासदार असतानाच्या कार्यकाळात त्यांनी वेळोवेळी रेल्वे मंत्रालय, राज्य सरकार आणि संबंधित यंत्रणांशी समन्वय साधून कामाचा वेग वाढवला आणि ट्रायल रनपर्यंत काम पोहोचवले.
बजरंग बप्पा सोनवणे: विद्यमान खासदार म्हणून त्यांनी प्रकल्पाचे उरलेले अडथळे दूर करून रेल्वे सेवा प्रत्यक्ष प्रवाशांसाठी सुरू करण्यासाठी जोरदार पाठपुरावा सुरू ठेवला.
जनआंदोलन आणि सर्वसामान्यांचा संघर्ष
हा लढा केवळ राजकीय नेत्यांपुरता मर्यादित नव्हता. या प्रवासात अनेक सामाजिक संघटना, पत्रकार, विद्यार्थी, व्यापारी आणि सामान्य जिल्हावासियांनी मोर्चे, उपोषणे आणि निवेदने देऊन हा लढा जिवंत ठेवला. या ऐतिहासिक क्षणी जिल्ह्यातील सर्व ज्ञात-अज्ञात नागरिक, आंदोलक आणि कष्टकऱ्यांचे बीडकरांकडून मनःपूर्वक आभार व्यक्त केले जात आहेत.
रेल्वे सुरू झाल्यामुळे बीड जिल्ह्यावरील ‘मागासलेपणाचा’ शिक्का पुसण्यास मदत होणार असून जिल्ह्याच्या सर्वांगीण विकासाचे नवे पर्व सुरू झाले आहे.