दोन दशकांच्या समर्पित सेवेचे फळ: रो. प्रवीण देशपांडे ‘बेस्ट असिस्टंट गव्हर्नर’ पुरस्काराने सन्मानित

लातूर:-रोटरी इंटरनॅशनल डिस्ट्रिक्ट ३१३२ च्या २०२५-२६ या वर्षातील भव्य पुरस्कार वितरण सोहळ्यात रोटरी क्लब ऑफ केजचे संस्थापक सदस्य रो. प्रवीण देशपांडे यांना ‘बेस्ट असिस्टंट गव्हर्नर’ या प्रतिष्ठेच्या पुरस्काराने सन्मानित करण्यात आले. लातूर येथील साळाई मंडपम येथे मोठ्या उत्साहात आणि मान्यवरांच्या उपस्थितीत हा सोहळा पार पडला.
रोटरी इंटरनॅशनल डिस्ट्रिक्ट ३१३२ चे कार्यक्षेत्र अत्यंत विस्तीर्ण असून यामध्ये मराठवाडा, अहिल्यानगर, सोलापूर आणि सातारा अशा एकूण ११ जिल्ह्यांचा समावेश होतो. या संपूर्ण कार्यक्षेत्रात उत्कृष्ट सहाय्यक प्रांतपाल (Assistant Governor) म्हणून कामगिरी बजावल्याबद्दल देशपांडे यांना हा पुरस्कार देण्यात आला. रोटरीतील त्यांची दोन दशकांची समर्पित सेवा, सातत्यपूर्ण सामाजिक कार्य आणि निष्ठा याचे हे फलित मानले जात आहे.
प्रमुख मान्यवरांची उपस्थिती
हा सोहळा रोटरीचे डिस्ट्रिक्ट ३१३२ चे पहिले प्रांतपाल जुबीन अमेरिया, डिस्ट्रिक्ट गव्हर्नर (२०२५-२६) रो. सुधीर लातुरे, डिस्ट्रिक्ट गव्हर्नर इलेक्ट क्षितिज झावरे, सौ. संगीता लातुरे आणि सौ. मधुरा झावरे यांच्या हस्ते पार पडला. या वेळी प्रचंड मित्रपरिवार, रोटरीचे इतर पदाधिकारी आणि हितचिंतक मोठ्या संख्येने उपस्थित होते.
प्रवीण देशपांडे यांचे मनोगत
पुरस्कार स्वीकारल्यानंतर भावना व्यक्त करताना रो. प्रवीण देशपांडे म्हणाले, “हा पुरस्कार मिळणे हे डिस्ट्रिक्ट गव्हर्नर रो. सुधीर लातुरे यांच्या अनमोल मार्गदर्शनामुळे आणि सहकार्यामुळेच शक्य झाले. हा केवळ माझा वैयक्तिक सन्मान नसून, रोटरी क्लब केजच्या संपूर्ण परिवाराच्या कार्याचा आणि दोन दशकांच्या सेवेचा गौरव आहे.”
प्रवीण देशपांडे हे रोटरी क्लब ऑफ केजचे संस्थापक सदस्य असून त्यांनी रोटरीच्या माध्यमातून सामाजिक सेवा, नेतृत्व विकास आणि संघटनात्मक बांधणीत नेहमीच पुढाकार घेतला आहे. त्यांना मिळालेल्या या राष्ट्रीय स्तरावरील सन्मानामुळे रोटरी क्लब केजची मान उंचावली असून संपूर्ण केज रोटरी परिवारात आनंदाचे वातावरण निर्माण झाले आहे.