केजच्या शिल्पकारांचे योगदान विसरणे अशक्य! चौकांच्या दुरवस्थेवर ‘स्मारक समिती’चा तोडगा

केज :-केज शहराच्या वैभवात भर घालणाऱ्या प्रमुख दोन चौकांच्या निर्मितीमागे मोठा ऐतिहासिक वारसा आणि ज्येष्ठांची दूरदृष्टी राहिलेली आहे. आज शहराचा विस्तार आणि महामार्गावरील वाढती रहदारी पाहता, अपघातांची मालिका रोखण्यासाठी  सर्वांनी एकत्र येऊन ‘स्मारक समिती’ स्थापन करावी, असे आवाहन केज येथील हास्य क्लबच्या सदस्यांनी प्रसिद्धीपत्रकाद्वारे केले आहे.
ज्येष्ठांच्या दूरदृष्टीतून झाली होती चौकांची निर्मिती
१९९१ ते १९९५ च्या काळात तत्कालीन सरपंच अंकुशराव अण्णा इंगळे, दिवंगत केशव आप्पा कदम, दिवंगत विश्वंभर कोकीळ, दिवंगत  सुंदर नाना कदम, सुंदर दादा नाईकवाडे, गिरीश देशपांडे, प्रशांत देशपांडे, संजय बापू शिंदे, दिवंगत बाबा रांजणकर, दिवंगत मुन्ना शेटे, बॉस कोकीळ, महादेव दादा कदम, दिवंगत नितीन काकाणी, दिवंगत राजाभाऊ बाप्पा गुंड, चिंतामण सत्वधर, विनोद शिंदे, दिनकर राऊत,धनंजय राऊत, दिलीप गुंड, आनिल पांचाळ दिवंगत मल्लिकार्जुन कुंभार, दिवंगत  बंडू राऊत, नारायण वळसे, दामू देव, दिवंगत लखन कोकीळ, चंद्रकांत गुंड, अशोकराव लोंढे, वसंतराव लोंढे, महेंद्र मस्के यांसारख्या अनेक ज्येष्ठ व मातब्बर सुपुत्रांनी कोणत्याही भेदाभेदाशिवाय एकत्र येत शहराच्या हितासाठी या दोन चौकांची पायाभरणी केली होती.
व्यापार, राजकारण आणि समाजकारणाच्या माध्यमातून केजचा विकास साधताना या सर्व ज्येष्ठांनी नेहमीच आपुलकी आणि प्रेमाचे वातावरण टिकवून ठेवले. आज यातील अनेक मान्यवर हयात नाहीत, मात्र त्यांनी दिलेले योगदान केजकर कधीही विसरू शकत नाहीत.
वाहतूक कोंडी आणि अपघातांवर उपाय
काळाच्या ओघात केजमध्ये नगरपंचायत अस्तित्वात आली आणि शहरातून जाणाऱ्या दोन प्रमुख महामार्गांमुळे वाहतूक आणि रहदारी प्रचंड वाढली. पूर्वी नसलेली अपघातांची मालिका सुरू झाल्याने नागरिकांच्या सुरक्षिततेचा प्रश्न गंभीर बनला होता. या समस्येवर तोडगा म्हणून  चौकांचे आकारमान कमी करून रस्ता रुंदीकरण व सुटसुटीतपणा आणला.
या निर्णयाचे बीड जिल्ह्याचे खासदार बजरंग बप्पा सोनवणे, कृषी उत्पन्न बाजार समितीचे चेअरमन अंकुशराव इंगळे, सूंदर दादा नाईकवाडे,काँग्रेस जिल्हाध्यक्ष राहुल भैया सोनवणे, बाळासाहेब ठोंबरे, गदळे सर, तसेच केज पोलीस ठाण्याचे पोलीस निरीक्षक सूर्यतळ साहेब या सर्वांनी कौतुक केले आहे. चौकाचे मूळ शिल्पकार आणि नागरिकांनीही या बदलाचे स्वागतच केले आहे.

‘हास्य क्लब’चे आवाहन

“जे हयात आहेत त्यांनी या बदलाचे कौतुक केले आहे आणि जे हयात नाहीत त्यांचे विचार नेहमीच केजच्या हिताचे होते. त्यामुळे या तांत्रिक व सुरक्षेच्या मुद्द्यावरून कुणीही राजकीय, धार्मिक वा जातीय द्वेष पसरवू नये. या चौकांची सध्या झालेली दुरवस्था पाहता, लोकप्रतिनिधी आणि नागरिकांनी पुढाकार घेऊन एक ‘स्मारक समिती’ स्थापन करावी. त्याद्वारे शहरात सुंदर, स्वच्छ आणि आखीव-रेखीव चौकांची पुनर्रचना करावी, यासाठी सर्व नागरिक सोबत आहेत.”
— सदस्य, हास्य क्लब (केज)