Uncategorized
आनंद आणि भक्तिभावाच्या वातावरणात केजच्या लक्ष्मीनगरमध्ये विठ्ठल – रुक्मिणी मूर्तीची मंगलमय स्थापना!

केज :-‘जय हरी विठ्ठल, ज्ञानदेवा तुकाराम’चा गजर आणि टाळ-मृदंगाच्या निनादात, दिवाळी पाडव्याच्या पावन पर्वावर केज शहरातील लक्ष्मीनगर सोसायटी येथे विठ्ठल – रुक्मिणी मूर्तीची प्राणप्रतिष्ठापना व अनावरण सोहळा अत्यंत भक्तिमय वातावरणात पार पडला. मंगळवारी (ता. १०) सकाळी ठीक दहा वाजता हभप / मान्यवरांच्या उपस्थितीत विधीवत पूजा व जलाभिषेक करून हा सोहळा संपन्न झाला.
वचनाची पूर्ती आणि ऋणातूनमुक्ती – रमाकांतबापू मुंडे
शहरातील एका आदर्श वसाहतीची ओळख असलेल्या लक्ष्मीनगर सोसायटीच्या स्थापनेवेळीच येथील नागरिकांना मंदिरासाठी जागा देण्याचे वचन रमाकांत बापू मुंडे यांनी दिले होते. पाडव्याच्या मुहूर्तावर हे मंदिर आणि मूर्तीची स्थापना करून दिलेला शब्द पूर्ण केल्याची भावना त्यांनी यावेळी व्यक्त केली. तसेच, आगामी काळात या परिसरातील रस्ते, नाले, वीज यांसह ओपन स्पेसचे सुशोभीकरण करून येथे एक भव्यदिव्य मंदिर उभे करण्याचा आपला मानस असल्याचे त्यांनी आवर्जून सांगितले. या सोहळ्यामुळे आपल्यावरील वसाहतीचे ऋण फिटल्याची कृतज्ञता त्यांनी व्यक्त केली.
आदर्श वसाहतीची ओळख – उषाताई मुंडे
याप्रसंगी आपल्या भावना व्यक्त करताना उषाताई मुंडे म्हणाल्या की, लक्ष्मीनगर सोसायटी केवळ केज शहरातच नव्हे, तर संपूर्ण परिसरात एक आदर्श आणि संस्कारित सोसायटी म्हणून गणली जावी, अशी आपली इच्छा आहे. संतांच्या विचारांचा वारसा जपत या वसाहतीमधील नागरिकांनी कायम एकत्र राहून सामाजिक सलोखा ठेवावा, असे आवाहन त्यांनी केले.
वारकरी संप्रदाय व मान्यवरांच्या उपस्थितीने सोहळा समृद्ध
या मंगल प्रसंगी दहिफळ (वडमाऊली) येथील माजी सरपंच बाळासाहेब मोराळे, मधुर भैय्या मुंडे, दत्ता घुले, डॉ. अजित तांदळे, बंडू घुले, दत्ता ठोंबरे, भारत हांगे, विलास ठोंबरे, राजाभाऊ घोळवे, रवी मुंडे, सुनील मोरे, भागवत सोनवणे, सचिन घोळवे आणि गायकवाड सर यांच्यासह लक्ष्मीनगर सोसायटीचे आबालवृद्ध नागरिक व वारकरी संप्रदायातील भाविक मोठ्या संख्येने उपस्थित होते.
पाडव्याच्या शुभदिनी विठ्ठल-रुक्मिणीच्या चरणी लीन होऊन केजवासीयांनी या अध्यात्मिक सोहळ्याचा मनसोक्त आनंद घेतला.



