Uncategorized

केजचे नवे तहसीलदार संभाजीनगर गुन्हा नोंद व अहिल्यानगर मालमत्ता चौकशीच्या विळख्यात; केजला न्याय मिळणार का, जनतेमधे संभ्रम

नितीन रमेश गर्जे यांच्यावर गुन्हा नोंद; अहिल्यानगर चौकशीचा उल्लेख

केज / छत्रपती संभाजीनगर: बीड जिल्ह्यातील २३२-केज विधानसभा मतदारसंघासाठी विशेष सखोल पुनरिक्षण-२०२६ या निवडणूक विषयक कामाकरिता तहसीलदार नितीन गर्जे (नियुक्तीच्या प्रतीक्षेत) यांच्याकडे ‘सहाय्यक मतदार नोंदणी अधिकारी तथा तहसीलदार, केज’ या पदाचा तात्पुरता पदभार सोपवण्यात आला आहे. विभागीय आयुक्त कार्यालय, छत्रपती संभाजीनगर (महसूल शाखा) यांच्या वतीने १९ नोव्हेंबर २०२६ रोजी हा आदेश जारी करण्यात आला आहे.  

आदेशातील मुख्य बाबी

ही नेमणूक कायमस्वरूपी प्रशासकीय बदली नसून मतदार याद्यांच्या विशेष सखोल पुनरिक्षण-२०२६ या निवडणूक कामासाठी तात्पुरत्या स्वरूपात करण्यात आली आहे

नितीन गर्जे यांनी ३ नोव्हेंबर २०२६ रोजी दिलेल्या अर्जान्वये पाथरी येथील विशेष सखोल पुनरिक्षण कार्यक्रमाचे कामकाज पूर्ण झाल्याचे आणि कौटुंबिक व मानसिक अडचणींमुळे पाथरी येथील रिक्त पदाचा कार्यभार काढून इतर ठिकाणी पदस्थापना करण्याची विनंती केली होती; त्यानुसार हा तात्पुरत्या पदभारातील बदल करण्यात आला आहे

निवडणूक विषयक कामकाज असल्याने आदेशाच्या दिनांकापासून २४ तासांच्या आत कार्यभार स्वीकारणे बंधनकारक असून, हलगर्जीपणा केल्यास लोकप्रतिनिधीत्व अधिनियम १९५० व १९५१ तसेच महाराष्ट्र नागरी सेवा (शिस्त व अपील) नियम १९७९ नुसार कारवाईचा इशारा देण्यात आला आहे  

छत्रपती संभाजीनगरमधील गुन्हा नोंद व निलंबन

उपलब्ध सार्वजनिक व न्यायालयीन नोंदींनुसार, छत्रपती संभाजीनगर येथील अपर तहसीलदार नितीन रमेश गर्जे यांच्याविरुद्ध सिटी चौक पोलीस ठाण्यात (गुन्हा नोंद क्र. ०२०१/२५, भ्रष्टाचार प्रतिबंधक अधिनियम १९८८ अंतर्गत कलम ७(अ) आणि १२) १६ मे २०२५ रोजी गुन्हा नोंद झाला होता. मिटमिटा येथील प्लॉटच्या क्षेत्र दुरुस्ती व संबंधित कामासाठी मध्यस्थांमार्फत लाच मागितल्याचा आरोप या प्रकरणात असून, जून २०२५ मध्ये शासनाकडून त्यांच्या निलंबनाचे आदेश जारी करण्यात आले होते. या प्रकरणात मुंबई उच्च न्यायालयाच्या औरंगाबाद खंडपीठाने ९ जुलै २०२५ रोजी अटकपूर्व जामीन अर्ज फेटाळल्यानंतर, सर्वोच्च न्यायालयाने ८ ऑक्टोबर २०२५ रोजी तपासात सहकार्य करण्याच्या व अटी-शर्तींच्या अधीन राहून अटक झाल्यास जामिनावर सोडण्याचे निर्देश दिले होते.

अहिल्यानगरमधील मालमत्ता चौकशीचा संदर्भ

उच्च न्यायालयाच्या आदेशातील नोंदीनुसार, नितीन रमेश गर्जे यांच्या विरोधात अहिल्यानगर येथे बेहिशेबी/बेनामी मालमत्तेसंदर्भात खुली चौकशी (Open Enquiry No. ८/२०१९) सुरू असल्याचा उल्लेख आढळतो. दुसरीकडे, सर्वोच्च न्यायालयातील सुनावणीदरम्यान याचिकाकर्त्याच्या वकिलांनी पूर्वीच्या प्रकरणांमध्ये खटला चालवण्याची परवानगी नाकारण्यात आल्याचा तसेच या चौकशीत कोणतीही न्यायालयीन कार्यवाही प्रलंबित नसल्याचा युक्तिवाद नोंदवला होता; त्यामुळे हे सर्व मुद्दे न्यायप्रविष्ट व तपासाधीन स्वरूपाचे आहेत.

जनतेमध्ये संभ्रम आणि चर्चा

संभाजीनगरमधील लाच गुन्हा नोंद आणि अहिल्यानगरमधील मालमत्ता चौकशीच्या पार्श्वभूमीवर केजच्या नव्या पदभारावरून तालुक्यात विविध चर्चांना उधाण आले आहे. प्रशासकीय कामकाजात पारदर्शकता आणि केजच्या जनतेला खऱ्या अर्थाने न्याय मिळणार का, याबाबत नागरिकांमध्ये संभ्रमाचे वातावरण निर्माण झाले आहे.

संपादक विनोद शिंदे

क्रांतीसुर्य न्युज मधे आपले स्वागत आहे सर्व वाचकांना विश्वसनीय बातम्या देण्याचा आमचा प्रयत्न आहे प्रत्येक मताशी संपादक सहमत आसेल असे नाही जर कोणताही वाद विवाद उत्पन्न झाला तर तो सक्षम न्यायालय अंतर्गत आसेल आपणही आपल्या परीसरातील बातम्यासाठी ९९२२२६८३७७ या व्हॉटसएप वर संपर्क साधा जाहीराती साठी किंवा बातमी देण्यासाठी आर्थिक देवाण घेवाण करण्यासाठी अजिबात संपर्क करु नका जर संपर्क केला तर कायदेशीर पने गुन्हा दाखल केला जाईल

Related Articles

Leave a Reply

Your email address will not be published. Required fields are marked *

Back to top button