‘कट रचायला सौरभ अजून लहान, आधी आपली उंची बघा’; धनंजय मुंडेंच्या भूमिकेवर राजकीय वर्तुळातून प्रश्नचिन्ह!

केज:- विलास घुले हत्या प्रकरणानंतर जिल्ह्यातील राजकीय वातावरण कमालीचे तापले असून, या प्रकरणावरून सुरू असलेल्या राजकारणावर आता तीव्र आक्षेप घेतला जात आहे. माजी मंत्री, माजी विरोधी पक्षनेते तथा विद्यमान आमदार धनंजय मुंडे यांनी या प्रकरणात थेट २३ वर्षीय युवा नेते सौरभ सोनवणे यांच्यावर कट रचल्याचे आरोप केल्याने नवीन वादाला तोंड फुटले आहे. “तुमची राजकीय लढाई खासदार बजरंग बप्पा सोनवणे यांच्यासोबत असायला हवी, पण तुम्ही अवघ्या २३ वर्षांच्या सौरभ सोनवणेसोबत लढाई धरली आहे, हे जनतेला न समजणारे गणित आहे,” असा थेट सवाल आता उपस्थित केला जात आहे.
‘२३ वर्षांच्या तरुणाशी लढाई कितपत योग्य?’
मिळालेल्या माहितीनुसार, विलास घुले यांच्या हत्येप्रकरणातील दोषींना कडक शिक्षा व्हावी ही सर्वांचीच इच्छा आहे. मात्र, या हत्येच्या आडून जे राजकारण केले जात आहे, ते न पटण्यासारखे असल्याचे बोलले जात आहे. धनंजय मुंडे यांचे वय ५१ वर्षे आहे, तर सौरभ सोनवणे केवळ २३ वर्षांचे आहेत. त्यांचे वय कट रचण्याचे नसून अजून शिकण्या-सवरण्याचे आहे. ते साधे ग्रामपंचायत सदस्यही नाहीत. अशा वेळी एवढ्या मोठ्या उंचीच्या नेत्याने एका तरुणाला लक्ष्य करणे कितपत योग्य आहे? धनंजय मुंडे हे केवळ मुख्यमंत्री व्हायचे बाकी राहिलेले राज्यातील मोठे नेते आहेत, त्यांनी आपली राजकीय उंची आणि सौरभची उंची याचा विचार करायला हवा, असा सूर उमटत आहे.
‘सोबत असलेल्या गुन्हेगारी पार्श्वभूमीच्या लोकांवर नजर टाका’
आमदार मुंडे यांच्यावर निशाणा साधताना त्यांच्यासोबत असणाऱ्या कार्यकर्त्यांच्या पार्श्वभूमीवरही बोट ठेवण्यात आले आहे. मुंडेंच्या सोबत कायम वावरणाऱ्या लोकांवर कमीत कमी पाच गुन्हे दाखल आहेत, अशी टीका केली जात आहे.
तसेच, या प्रकरणात फिर्यादी असलेले मृत विलास घुले यांचे भाऊ रमेश घुले यांनी फिर्याद देणे योग्य असले, तरी ते स्वतःही ‘धुतल्या तांदळासारखे’ नाहीत. त्यांच्यावरही किमान १० गुन्हे दाखल असून, अवादा (Avaada) कंपनीने त्यांच्यावर पहिली अपहरणाची फिर्याद दाखल केली होती, याकडेही लक्ष वेधण्यात आले आहे.
‘पॉक्सो’चा आरोपी करतोय आरोप!
सौरभ सोनवणे यांनी कट रचून ही हत्या केल्याचा आरोप करणाऱ्यांवरही गंभीर आक्षेप घेण्यात आले आहेत. स्वतःच्या सख्या पुतणीला न सोडणाऱ्या आणि ‘पॉक्सो’ (POCSO) कायद्यांतर्गत गुन्हा दाखल असलेल्या उमेश माने याच्यासारखी मंडळी आज सौरभ सोनवणे यांच्यावर कट रचल्याचे आरोप करत आहेत, ही अत्यंत दुर्दैवी आणि हास्यास्पद बाब असल्याचे मसुद्यात म्हटले आहे.

थोडक्यात काय तर…
विलास घुले यांच्या हत्येचे दुःख सर्वांनाच आहे आणि दोषींवर कारवाई झालीच पाहिजे. मात्र, राजकीय द्वेषापोटी खासदार बजरंग बप्पा सोनवणे यांच्या परिवाराला बदनाम करण्यासाठी २३ वर्षांच्या मुलाला यात ओढणे चुकीचे आहे. धनंजय मुंडे यांनी विनाकारण आरोप न करता आपली राजकीय उंची सांभाळावी, अशी चर्चा आता जिल्ह्यात जोर धरू लागली आहे.