अश्रू पुसणारा देवदूत! हताश ऊसतोड मजुराच्या संकटात डॉ. ओमप्रकाश शेटे धावले; ‘या’ लोकनेत्याला आमदार करून भाजपने तिन्ही जिल्ह्यांतील गोरगरिबांना न्याय द्यावा,

बीड :-आजच्या धावपळीच्या आणि स्वार्थी जगात माणुसकी आणि प्रामाणिकपणा अत्यंत दुर्मिळ झाला आहे. बीड जिल्ह्यातील ‘घुगे’ नावाच्या एका गरीब ऊसतोड मजुराच्या बाबतीत नेमका हाच अनुभव आला. त्यांच्या पत्नीला (शितल बानगुडे) मेंदूचा ट्युमर (ब्रेन ट्युमर) झाल्याचे निदान झाले होते. उपचाराचा अवाढव्य खर्च परवडणारा नसल्याने या हताश मजुराने अनेकांकडे मदतीची याचना केली, अनेकांच्या पायावर डोके ठेवून व्याकुळतेने मदत मागितली. परंतु, समाजातील पाषाण हृदयांना पाझर फुटला नाही. अशा अत्यंत कठीण प्रसंगात गोरगरिबांचे आशेचा किरण ठरलेले डॉ. ओमप्रकाश शेटे हे संकटसमयी धावून आले आहेत.
भाजपने आमदार केल्यास तीन जिल्ह्यांतील गोरगरिबांना न्याय मिळणार:

डॉ. ओमप्रकाश शेटे यांनी नेहमीच राजकारण विरहित आणि नि:स्वार्थ भावनेने जनसेवा केली आहे. त्यांच्या याच दातृत्वामुळे आणि अहोरात्र चालणाऱ्या जनकार्यामुळे बीड, लातूर आणि धाराशिव या तिन्ही जिल्ह्यांत त्यांच्याबद्दल प्रचंड आदर आहे. याच पार्श्वभूमीवर, “गोरगरिबांच्या या देवदूताला आगामी बीड, लातूर, धाराशिव स्थानिक स्वराज्य संस्था निवडणुकांमध्ये भारतीय जनता पक्षाने (भाजप) उमेदवारीचे तिकीट देऊन आमदार करावे,” अशी तीव्र इच्छा या भागातील ऊसतोड मजूर, वंचित आणि सर्वसामान्य जनतेतून व्यक्त होत आहे. भाजपने डॉ. शेटे यांना तिकीट देऊन आमदार केले, तर या तीनही जिल्ह्यांतील गोरगरिबांना खऱ्या अर्थाने न्याय मिळेल आणि त्यांच्या हक्काचा माणूस विधीमंडळात पोहोचेल, असा ठाम विश्वास जनतेकडून व्यक्त केला जात आहे.

आयुष्मान भारत योजनेतून मोफत उपचार:

डॉ. ओमप्रकाश शेटे यांनी कोणतीही वेळ न दवडता आयुष्मान भारत योजनेच्या (PM-JAY) माध्यमातून या पीडित महिलेला तात्काळ मदत मिळवून दिली. पुणे येथील जुपीटर हॉस्पिटलमध्ये रुग्णावर अत्यंत गुंतागुंतीची शस्त्रक्रिया यशस्वीरित्या पार पडली.
या शस्त्रक्रियेसाठी आयुष्मान भारत योजनेअंतर्गत सुमारे ९५,००० रुपयांची रक्कम मंजूर करण्यात आली आहे. तसेच हॉस्पिटलमधील पुढील उपचारासाठी अंदाजे २७,००० रुपयांचे औषधोपचारही पुरवले जात आहेत. ‘शितल बानगुडे’ या महिला रुग्ण जोपर्यंत पूर्णपणे बऱ्या होत नाहीत, तोपर्यंत त्यांच्यावर विविध शासकीय योजनांमार्फत आणि सामाजिक दातृत्वातून पूर्णपणे मोफत उपचार केले जाणार असल्याचे डॉ. शेटे यांच्या निकटवर्तीयांनी सांगितले.

पीडित मजुराची भावुक प्रतिक्रिया:

“आमच्याकडे उपचारासाठी अजिबात पैसे नव्हते, आम्ही पूर्णपणे हताश झालो होतो. पण डॉ. ओमप्रकाश शेटे साहेबांनी आयुष्मान भारत योजनेच्या माध्यमातून केलेली मदत आमच्यासाठी लाखा मोलाची ठरली आहे. त्यांनी केलेले हे उपकार आम्ही कधीच फेडू शकणार नाही,” अशा शब्दांत पीडित ऊसतोड मजुराने आपले अश्रू अनावर करत कृतज्ञता व्यक्त केली.

  माणुसकीचे दर्शन:

आज समाजात अध्यात्माचा बुरखा पांघरून स्वतःचे हित साधणारे ढोंगी लोक वावरत असताना, डॉ. ओमप्रकाश शेटे यांच्यासारखे नि:स्वार्थ समाजसेवा करणारे नेतृत्व लाखो-करोडोंमध्ये एखादेच असते. प्रसिद्धी आणि चमत्काराची अपेक्षा न ठेवता केवळ समाजहितासाठी काम करणाऱ्या अशा चांगल्या लोकांमुळेच आज समाजात माणुसकी शिल्लक आहे, हे या घटनेवरून पुन्हा एकदा सिद्ध झाले आहे.