केजच्या सौंदर्यीकरणाला मिळणार नवी दिशा; रोटरी क्लबचे नगरपंचायतीला सहकार्याचे आवाहन

केज, दि. २ सप्टेंबर २०२६: केज शहराचा सर्वांगीण विकास आणि सौंदर्यीकरणासाठी ‘रोटरी क्लब ऑफ केज’ने पुढाकार घेतला आहे. शहराच्या तीन मुख्य पुलांचे सुशोभीकरण, झेब्रा क्रॉसिंग, विशेष स्वच्छता मोहीम आणि शहराच्या प्रमुख प्रवेशद्वारांवर आकर्षक स्वागत फलक लावण्याची परवानगी मिळावी, यासाठी रोटरी क्लबतर्फे केज नगरपंचायतीचे मुख्यधिकारी साहेब यांना निवेदन सादर करण्यात आले.
रोटरी क्लब नेहमीच सामाजिक उत्तरदायित्व आणि शहर विकासाच्या उपक्रमांमध्ये अग्रभागी राहिला आहे. केज शहराचे सौंदर्य वाढवण्यासाठी, वाहतुकीला शिस्त लावण्यासाठी आणि अपघात टाळण्यासाठी क्लबने लोकसहभाग व समाजप्रबोधनातून अनेक महत्त्वाची कामे हाती घेण्याचा निर्णय घेतला आहे. मुख्यधिकाऱ्यांना दिलेल्या निवेदनात प्रामुख्याने खालील बाबींचा समावेश आहे:
१. शहरातील मुख्य पुलांचे सुशोभीकरण: केजडी नदी, पिसाटी नदी आणि कृषी उत्पन्न बाजार समिती (मार्केट कमिटी) जवळील अशा तिन्ही प्रमुख पुलांचे सुशोभीकरण करण्यात येणार आहे. यामध्ये पुलांच्या सुरक्षा कठड्यांचे रंगकाम करणे आणि पादचाऱ्यांच्या सुरक्षिततेसाठी आवश्यक त्या ठिकाणी झेब्रा क्रॉसिंग  चे पट्टे आखण्याचा समावेश आहे.
२. विशेष स्वच्छता मोहीम: नगरपंचायतीच्या स्वच्छता विभागाच्या सहकार्याने सदर तिन्ही पुलांवर आणि आजूबाजूच्या परिसरात साचलेला कचरा, माती व घाण स्वच्छ करण्यासाठी विशेष मोहीम राबवण्यात येणार आहे.
३. शहराच्या प्रवेशद्वारांवर स्वागत फलक: केज शहरात प्रवेश करणाऱ्या चारही प्रमुख मार्गांवर “रोटरी क्लब ऑफ केज आपले सहर्ष स्वागत करीत आहे” अशा आशयाचे शिस्तबद्ध व आकर्षक स्वागत फलक उभारण्याचे क्लबचे नियोजन आहे.
या उपक्रमाबाबत बोलताना रोटरी क्लब ऑफ केजचे अध्यक्ष असरार कुरेशी यांनी सांगितले की, “शहराच्या हितासाठी आणि सौंदर्यीकरणासाठी आम्ही हा पुढाकार घेतला आहे. नगरपंचायत प्रशासनाने या उपक्रमास सकारात्मक मान्यता देऊन आवश्यक ती परवानगी द्यावी आणि स्वच्छता व वाहतूक नियोजनाच्या दृष्टीने योग्य ते सहकार्य करावे, ही आमची विनंती आहे.”
यावेळी रोटरी क्लब ऑफ केजचे अध्यक्ष रो.असरार कुरेशी सचिव रो. हनुमंत भोसले सर, रो. गिन्यानदेव गदळे सर, चवरे सुर्यकांत, विनोद शिंदे आणि पत्रकार सय्यद माजेद यांच्यासह अनेक पदाधिकारी उपस्थित होते. रोटरी क्लबच्या या उपक्रमाचे शहरवासीयांकडून स्वागत होत आहे.
नगरपंचायत प्रशासनाकडून या निवेदनाला कसा प्रतिसाद मिळतो, यावर शहराच्या सौंदर्यीकरणाचे पुढील नियोजन अवलंबून असेल. रोटरी क्लबच्या या पुढाकाराने केज शहराच्या विकासाला नवी गती मिळेल, अशी आशा व्यक्त केली जात आहे.