विश्वासाला तडा आणि ३४ लाखांचा घडा, मुनिमाने मालकाला दिला मोठा धडा!

केज :- येथील मार्केट यार्डातील नामांकित ‘सौदागर ट्रेडिंग कंपनी’ या आडत दुकानात काम करणाऱ्या विश्वासू मुनिमानेच मालकाचा विश्वासघात करून चक्क ३४ लाख रुपयांची घसघशीत रक्कम हडप केल्याची धक्कादायक घटना उघडकीस आली आहे. याप्रकरणी केज पोलीस ठाण्यात आरोपी मुनिमाविरुद्ध भारतीय न्याय संहिता (BNS), २०२३ च्या कलम ३१६ आणि ३१८ अन्वये फसवणूक व विश्वासघाताचा गुन्हा दाखल करण्यात आला आहे.
आजारपणाचा घेतला गैरफायदा: याबाबत पोलिसांकडून मिळालेल्या सविस्तर माहितीनुसार, केज येथील समता नगर (बीड रोड) भागात राहणारे आडत व्यापारी हाजीमौला सालमसाहेब सौदागर (वय ६५ वर्षे) हे मार्केट यार्डात ‘सौदागर ट्रेडिंग कंपनी’ चालवून आपल्या कुटुंबाचा उदरनिर्वाह करतात. त्यांच्या दुकानात ऑक्टोबर २०२२ पासून धारूर येथील रहिवासी शफिक आतीक शेख हा तरुण २०,००० रुपये प्रतिमहिना पगारावर मुनीम (मॅनेजर) म्हणून काम पाहत होता. गेल्या तीन वर्षांपासून काम करत असल्याने सौदागर यांनी त्याच्यावर पूर्ण विश्वास टाकला होता आणि दुकानाचा बहुतांश आर्थिक कारभार त्याच्याच स्वाधीन केला होता.
तक्रारदार हाजीमौला सौदागर यांना पाठीच्या मणक्याचा तीव्र त्रास सुरू झाल्याने, ते उपचारासाठी १७ जून २०२६ रोजी पत्नी व मुलासह जोधपूर (राजस्थान) येथील गोवर्धन हॉस्पिटलमध्ये गेले होते. जाण्यापूर्वी त्यांनी राजर्शी शाहू को-ऑपरेटिव्ह बँकेच्या आपल्या खात्याचे स्वतःची स्वाक्षरी केलेले चार चेक (क्र. ५८७२७०, ५८७२७१, ५८७२७४, ५८७२७५) दुकानातील कपाटात ठेवले होते आणि मुलगा जीशान याला ते सुरक्षित ठेवण्यास सांगितले होते. मात्र, मालक बाहेरगावी गेल्याची संधी साधून मुनीम शफिक शेख याने कपाटातील ते चारही चेक चोरले.
चेक परस्पर स्वतःच्या खात्यावर वळवले: त्यानंतर आरोपी मुनिमाने कोणत्याही परवानगीशिवाय त्या चेकवर अनुक्रमे ८ लाख, ८ लाख, १० लाख आणि ८ लाख अशा रकमा भरून, एकूण ३४ लाख रुपये राजर्शी शाहू अर्बन को-ऑपरेटिव्ह बँक शाखा धारूर येथील स्वतःच्या खात्यावर परस्पर जमा करून घेऊन ते पैसे काढले. हा सर्व व्यवहार २० जून २०२६ रोजी पार पडला. २३ जून रोजी बँक मॅनेजरने फोन करून मोठ्या रकमेच्या ट्रान्स्फरबाबत विचारणा केली असता हा फसवणुकीचा प्रकार उघडकीस आला.
दुसऱ्या व्यापाऱ्यालाही कोट्यवधींचा गंडा? तक्रारदार सौदागर यांनी राजस्थानवरून तातडीने केज येथे परत येत मुनीम शफिक शेख याचा शोध घेण्याचा प्रयत्न केला, मात्र तो मोबाईल बंद करून गायब झाला होता. धक्कादायक बाब म्हणजे, आरोपी शफिक याने शेजारील ‘सौदादार ट्रेडर्स’चे मालिक मैमुना खालिद शेख यांच्याही दुकानातून अशाच प्रकारे विश्वास संपादन करून जवळपास ५०० ते ६०० पोते सोयाबीन (किंमत अंदाजे ३० ते ४० लाख रुपये) परस्पर विकून फसवणूक केल्याचे समोर आले आहे.
हाजीमौला सालमसाहेब सौदागर यांच्या फिर्यादीवरून केज पोलीस ठाण्यात गुन्हा रजि. नंबर ०४३०/२०२६ अन्वये गुन्हा दाखल करण्यात आला असून, घटनेचा पुढील तपास पोलीस निरीक्षक स्वप्नील कचारू यांच्या मार्गदर्शनाखाली सहाय्यक पोलीस निरीक्षक (API) असद चांदपाशा शेख हे करत आहेत. विश्वासू नोकरानेच लाखो रुपयांचा गंडा घातल्याने केज मधील व्यापारी वर्गात एकच खळबळ उडाली आहे.