प्यायला पाणी नाही, पिकाला भाव नाही; मग मुंबई-पुण्यासाठी आमच्या जमिनींवर नांगर कशाला?

आमच्याच जमिनी, अन् आम्हालाच बंदी? ट्रॅक्टर-दुचाकीला रोखणारा महामार्ग शेतकऱ्यांच्या मुळावर!

विशेष वृत्त : कल्याण अहिल्यानगर आष्टी पाटोदा मांजरसूबा कळंब, केज आणि लातूर असा अनेक जिल्ह्यांतून जाणाऱ्या प्रस्तावित महामार्गावरून स्थानिक शेतकऱ्यांमध्ये तीव्र असंतोष पसरला आहे. “शेतीमालाला चांगला भाव मिळेल” या गोंडस आश्वासनाखाली सरकार कवडीमोल भावात सुपीक जमिनी हडप करत असून, हा महामार्ग ग्रामीण जनतेसाठी उपयुक्त नसून बड्या व्यापाऱ्यांच्या फायद्यासाठी आखलेला बनाव आहे, असा घणाघाती आरोप स्थानिक शेतकऱ्यांनी केला आहे.

आमची वाहने कुठे चालवायची?

शेतकऱ्यांनी उपस्थित केलेल्या मुख्य मुद्यांनुसार, ग्रामीण भागातील आणि खेड्यापाड्यातील लोकांकडे आलिशान चारचाकी वाहने नसून ट्रॅक्टर, बैलगाडी आणि मोटरसायकल हीच रोजची वाहने आहेत. या नव्या महामार्गांवर मात्र या वाहनांना बंदी घालण्यात आली आहे. २ हजार लोकसंख्येच्या गावात जेमतेम दोन ते चार लोकांकडे चारचाकी असते; मग उर्वरित ९५ टक्के जनतेने या रस्त्याचा उपयोग कसा करायचा, असा संतप्त सवाल विचारला जात आहे. जुने महामार्ग हे सर्वसामान्यांच्या नाळेशी जोडलेले होते, त्यावर बैलगाडीपासून ट्रॅक्टरपर्यंत सर्व वाहने धावत होती. नव्या महामार्गावर मात्र चढायचे म्हटले तरी जबर टोल मोजावा लागतो.

पाणी आणि भावाचा पत्ता नाही, मग मुंबई-पुण्याला रस्ता कशाला?

“ग्रामीण भागात प्यायला पाणी नाही, तिथे शेती पिकवायची कशी? आणि शेती कशीबशी पिकवली तरी तिला बाजारात योग्य भाव मिळत नाही. तालुक्याच्या आणि जिल्ह्याच्या ठिकाणी शेतकऱ्यांना हक्काच्या भावासाठी मोर्चे काढावे लागतात, तिथे न्याय मिळत नाही; मग मुंबई-पुण्याला वेगाने रस्ता करून शेतकरी तिथे जाऊन काय करणार?” असा सवाल शेतकरी विचारत आहेत. दुष्काळी मराठवाड्यात सिंचन आणि स्थानिक बाजारपेठांची गरज असताना, केवळ महानगरांचे अंतर कमी करण्यासाठी शेतकऱ्यांच्या जमिनींवर नांगर फिरवला जात असल्याची भावना व्यक्त होत आहे.

विकास कोणाचा?

शेतकऱ्यांच्या मते, ज्या जमिनीवर पिढ्यानपिढ्या पोट भरले, ती जमीन महामार्गाच्या नावाखाली काढून घेऊन शेतकऱ्याला भूमिहीन केले जात आहे. ग्रामीण भागातील साधनसंपत्ती लुटून मुंबई-पुण्यातील मोठ्या व्यापाऱ्यांच्या घशात घालण्यासाठीच हा मार्ग आखला जात आहे. त्यामुळे या प्रकल्पाला ‘जनकल्याण’ म्हणण्याऐवजी ‘लूट कल्याण महामार्ग’ असेच नाव द्यावे, अशी संतप्त मागणी आता ग्रामीण भागातून जोर धरू लागली आहे.