“जेल की जत्रा?” वाल्मिक कराडच्या ‘व्हीआयपी’ चोचल्यांवर सुप्रिया सुळे भडकल्या; “दोषी पोलिसांना बेड्या ठोकून नागपूरला डांबा!”

 मुंबई:-बीड जिल्हा कारागृहातील ढिसाळ आणि संशयास्पद कारभारावर राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी तीव्र संताप व्यक्त केला आहे. मस्साजोगचे सरपंच संतोष देशमुख यांच्या हत्येतील मुख्य आरोपी वाल्मिक कराड याला बीड कारागृहात ‘व्हीआयपी’ सुविधा मिळत असल्याचा धक्कादायक प्रकार समोर आल्यानंतर, सुप्रिया सुळे यांनी मुख्यमंत्र्यांकडे याप्रकरणी कठोर कारवाईची थेट मागणी केली आहे. वाल्मिक कराडची बीडमधून तात्काळ नागपूर मध्यवर्ती कारागृहात रवानगी करावी आणि त्याला मदत करणाऱ्या पोलीस अधिकारी व कर्मचाऱ्यांवर फौजदारी गुन्हे दाखल करावेत, अशी आक्रमक भूमिका त्यांनी घेतली आहे.
कारागृहातूनच दहशत आणि नियमबाह्य सुविधांचा वापर
संतोष देशमुख यांचे बंधू धनंजय देशमुख यांनी कारागृह अधीक्षकांना दिलेल्या पत्रानुसार आरोपी वाल्मिक कराड याला बीड कारागृहात अनेक बेकायदेशीर सवलती पुरवल्या जात आहेत.
बेकायदेशीर फोन आणि व्हिडिओ कॉल: इतर कैद्यांच्या नावे तसेच वकिलांच्या सिमकार्डचा वापर करून आरोपी बाहेरील लोकांच्या संपर्कात आहे. दुपारच्या बंदीच्या काळात त्याला थेट अधीक्षक कार्यालयात बसवून व्हिडिओ कॉलची सुविधा दिली जात असल्याचा आरोप आहे.
सीसीटीव्हीचा अभाव: ज्या कक्षातून फोन उपलब्ध करून दिला जातो, तिथे जाणीवपूर्वक सीसीटीव्ही कॅमेरा बसवण्यात आलेला नाही.
कारागृहातून नेटवर्क: या सर्व सुविधांचा गैरफायदा घेत आरोपी वाल्मिक कराड कारागृहाच्या आतूनच बीडमधील इतर साथीदारांच्या मदतीने बाहेर दहशत निर्माण करत असल्याचा गंभीर आरोप पत्रात करण्यात आला आहे.
उच्चस्तरीय चौकशी व दोषींवर कारवाईची मागणी
हा प्रकार म्हणजे न्यायप्रक्रियेची उघड पायमल्ली असल्याचे सांगत सुप्रिया सुळे यांनी प्रशासनाच्या हलगर्जीपणावर ताशेरे ओढले आहेत. त्यांनी राज्याच्या मुख्यमंत्र्यांकडे खालील प्रमुख मागण्या मांडल्या आहेत:
1. सीसीटीव्ही व कॉल लॉग जप्ती: बीड कारागृहातील सर्व सीसीटीव्ही फुटेज, कॉल लॉग्स आणि भेट नोंदवही (विझिटर्स रजिस्टर) तात्काळ जप्त करून वरिष्ठ पातळीवर सखोल चौकशी व्हावी.
2. नागपूर जेलमध्ये रवानगी: राजकीय प्रभाव आणि स्थानिक संधान लक्षात घेता वाल्मिक कराडची बीड कारागृहातून नागपूर मध्यवर्ती कारागृहात रवानगी करण्यात यावी.
3. दोषींवर गुन्हे: गुन्हेगाराला राजाश्रय देणाऱ्या आणि मदत करणाऱ्या सर्व संबंधित कारागृह अधिकारी व कर्मचाऱ्यांवर तात्काळ फौजदारी गुन्हे दाखल करावेत.
पीडित देशमुख कुटुंबाला न्याय मिळेपर्यंत आणि या प्रकरणातील दोषींवर कडक कारवाई होईपर्यंत आपण या मुद्द्यावर शेवटपर्यंत आग्रही राहणार असल्याचे खासदार सुप्रिया सुळे यांनी स्पष्ट केले आहे.