२० वर्षांचा थरार संपला! पुराव्यांचा पत्ताच नाही; पद्मसिंह पाटीलांसह सर्व ९ आरोपींची न्यायालयाकडून निर्दोष मुक्तता!

मुंबई:-महाराष्ट्राच्या राजकीय वर्तुळाचे लक्ष लागून राहिलेल्या पवनराजे निंबाळकर हत्याकांड प्रकरणात आज विशेष सीबीआय न्यायालयाने अत्यंत महत्त्वाचा निकाल दिला आहे. या प्रकरणातील मुख्य आरोपी आणि राज्याचे माजी गृहमंत्री डॉ. पद्मसिंह पाटील यांच्यासह सर्व ९ आरोपींची न्यायालयाने पुराव्याअभावी निर्दोष मुक्तता (Acquitted) केली आहे. तब्बल २० वर्षांनंतर या प्रकरणाचा निकाल लागला आहे.
तपासातील त्रुटींवर न्यायालयाचे कडक ताशेरे
निकाल वाचन करताना विशेष न्यायालयाने सीबीआयच्या तपासातील गंभीर त्रुटींवर बोट ठेवले. न्यायालयाने नोंदवलेली महत्त्वाची निरीक्षणे खालीलप्रमाणे:
ठोस पुराव्यांचा अभाव: सीबीआयने न्यायालयात सादर केलेले पुरावे आरोपींना दोषी ठरवण्यासाठी पुरेसे आणि ठोस नव्हते, असे न्यायालयाने स्पष्ट केले.
माफीच्या साक्षीदाराची साक्ष फेटाळली: या संपूर्ण खटल्याची मुख्य भिस्त पारसमल जैन या ‘माफीच्या साक्षीदारावर’ (Approver) होती. मात्र, त्याचा जबाब अत्यंत संशयास्पद आणि विसंगत आढळल्याने न्यायालयाने त्याची साक्ष अमान्य केली. खटल्यादरम्यान तो न्यायालयासमोर फितूरही झाला.
बळजबरीने जबाब घेतल्याचा संशय: पारसमल जैन याला मारहाण करून किंवा दबावाखाली आणून कबुली जबाब घेण्यात आल्याचे समोर आले. यावर टिप्पणी करताना न्यायालयाने म्हटले, “एवढी मोठी मालमत्ता असलेला व्यक्ती अवघ्या ५० हजारांच्या सुपारीसाठी असा गुन्हा करेल यावर विश्वास ठेवता येत नाही.” यामुळे या केसचा पायाच अत्यंत ठिसूळ असल्याचे न्यायालयाने नमूद केले.
न्यायालयात २० वर्षांनंतर दोन पिढ्या आमनेसामने
या ऐतिहासिक निकालाच्या वेळी न्यायालयात कमालीची उत्सुकता आणि तणाव पाहायला मिळाला. तब्बल दोन दशकांनंतर लागणाऱ्या या निकालासाठी ८६ वर्षीय डॉ. पद्मसिंह पाटील आणि पवनराजे निंबाळकर यांचे सुपुत्र खासदार ओमराजे निंबाळकर हे न्यायालयात समोरासमोर हजर होते.
दरम्यान, आरोपी पिंटू सिंग हा वेळेत न्यायालयात हजर न झाल्याने निकालाच्या वाचनाला काही काळ विलंब झाला होता. अखेर तो हजर झाल्यानंतर सर्व कायदेशीर प्रक्रिया पूर्ण करून न्यायालयाने सर्व आरोपींना या प्रकरणातून सन्मानपूर्वक दोषमुक्त केले. सीबीआयसाठी हा निकाल एक मोठा धक्का मानला जात आहे.