मनोज जरांगे पाटील यांच्या आंदोलनाला ऐतिहासिक यश! मुख्यमंत्री देवेंद्र फडणवीसांचा मोठा निर्णय; ओबीसींप्रमाणेच मराठा विद्यार्थ्यांना मिळणार ‘या’ ८ मोठ्या सवलती!

मुंबई:-मराठा समाजातील विद्यार्थ्यांना उच्च शिक्षणासाठी आर्थिक अडचण येऊ नये आणि ओबीसी समाजातील विद्यार्थ्यांप्रमाणेच त्यांनाही प्रगतीच्या समान संधी मिळाव्यात, यासाठी सरकारने एक मोठा आणि अत्यंत महत्त्वपूर्ण निर्णय घेतला आहे. या ऐतिहासिक निर्णयानुसार, ओबीसी प्रवर्गातील विद्यार्थ्यांना ज्या शैक्षणिक सवलती आणि सोयी-सुविधा मिळतात, त्या आता मराठा समाजातील विद्यार्थ्यांनाही लागू करण्यात आल्या आहेत. अखेर मनोज जरांगे पाटील यांच्या आंदोलनाला मोठे यश आले असून, मराठा समाजासाठी तब्बल ८ विशेष योजना सुरू करण्याचा निर्णय सरकारने घेतला आहे.
या निर्णयामुळे मराठा समाजातील हजारो विद्यार्थ्यांना उच्च आणि व्यावसायिक शिक्षणात मोठा आर्थिक दिलासा मिळणार आहे.
मराठा समाजासाठी लागू झालेल्या ‘त्या’ ८ महत्त्वपूर्ण योजना खालीलप्रमाणे:
मराठा समाजातील तरुणांच्या शैक्षणिक आणि आर्थिक उन्नतीसाठी शासनाने खालील ८ कलमी योजनांची घोषणा केली आहे:
१) शालांत परिक्षोत्तर शिष्यवृत्ती योजना:
दहावी आणि बारावीच्या परीक्षेनंतर पुढील उच्च शिक्षणासाठी मराठा समाजातील विद्यार्थ्यांना ही शिष्यवृत्ती दिली जाईल.
२) मोटार वाहन चालक व वाहक प्रशिक्षण योजना:
मराठा समाजातील तरुणांना रोजगार आणि स्वयंरोजगाराच्या संधी उपलब्ध करून देण्यासाठी विशेष वाहन चालक व वाहक (ड्रायव्हर आणि कंडक्टर) प्रशिक्षण योजना राबवली जाईल.
३) माध्यमिक व उच्च माध्यमिक शिष्यवृत्ती योजना:
माध्यमिक  आणि उच्च माध्यमिक वर्गातील गरजू व गुणवंत विद्यार्थ्यांना या योजनेचा थेट लाभ मिळणार आहे.
४) इतर १६ बाबींबाबतची प्रतिपूर्ती योजना:
शैक्षणिक शुल्काव्यतिरिक्त विद्यार्थ्यांना लागणाऱ्या इतर १६ विविध बाबींवरील खर्चाची प्रतिपूर्ती थेट शासनाकडून केली जाणार आहे.
५) परराज्यात शिकणाऱ्या विद्यार्थ्यांसाठी विशेष योजना:
महाराष्ट्र राज्यातील रहिवासी असणारे परंतु परराज्यात (इतर राज्यांमध्ये) अनुदानित व विनाअनुदानित व्यावसायिक अभ्यासक्रमांसाठी  प्रवेश घेतलेल्या मराठा उमेदवारांनाही आता सरकारी योजनेचा लाभ घेता येईल.
६) सर्व व्यावसायिक अभ्यासक्रमांसाठी पात्रता:
ओबीसी विद्यार्थ्यांना ज्या-ज्या शैक्षणिक सवलती आणि सोयी-सुविधा मिळण्यासाठी जे अभ्यासक्रम पात्र आहेत, त्या सर्व कोर्सेससाठी आता मराठा समाजातील विद्यार्थीही पूर्णपणे पात्र ठरतील.
७) रिक्त जागांवर प्रवेश घेतलेल्या विद्यार्थ्यांना सवलत:
केंद्रीय प्रवेश प्रक्रिया पूर्ण झाल्यानंतर महाविद्यालयांमध्ये रिक्त राहिलेल्या जागांवर, प्रवेश नियंत्रण समितीने मान्यता दिलेल्या संस्थास्तरावर प्रवेश घेतलेल्या इतर मागासवर्गीय ओबीसी विद्यार्थ्यांप्रमाणेच आता मराठा समाजातील विद्यार्थ्यांनाही सर्व शैक्षणिक सवलती लागू केल्या जातील.
८) भविष्यातील सवलती आपोआप लागू होणार:
या निर्णयातील सर्वात महत्त्वाचा मुद्दा म्हणजे, इतर मागास प्रवर्गाला ओबीसी  सध्या लागू असलेल्या किंवा भविष्यात ज्या काही नवीन शैक्षणिक सवलती व सोयी-सुविधा लागू केल्या जातील, त्या सर्व सवलती पुढील कोणत्याही नवीन आदेशाची वाट न पाहता मराठा समाजास ‘आपोआप’ लागू होतील.

आंदोलनाला मोठे यश, विद्यार्थ्यांमध्ये आनंदाचे वातावरण

“मराठा समाजातील आर्थिकदृष्ट्या दुर्बल घटकांना आणि मुख्यत्वे विद्यार्थी वर्गाला मुख्य प्रवाहात आणण्यासाठी हा निर्णय मैलाचा दगड ठरेल. ओबीसी बांधवांप्रमाणेच आता मराठा विद्यार्थ्यांनाही प्रगतीची समान कवाडे खुली झाली आहेत.”

मनोज जरांगे पाटील यांच्या सातत्यपूर्ण आंदोलनानंतर सरकारने हा महत्त्वाचा पाऊल उचलल्याचे बोलले जात आहे. या निर्णयामुळे मेडिकल, इंजिनिअरिंग, मॅनेजमेंट यांसारख्या उच्च आणि महागड्या व्यावसायिक शिक्षणाचा खर्च मराठा समाजातील सामान्य कुटुंबांच्या आवाक्यात येणार असून, यामुळे विद्यार्थी आणि पालकांमध्ये आनंदाचे वातावरण आहे. लवकरच या सर्व योजनांच्या अंमलबजावणीचे शासन निर्णय (GR) निर्गमित केले जातील.