केजचा मंडळधिकारी भालेराव की ‘वसुली सम्राट’? पैशांसाठी अडवले फेरफार; खासदार बजरंग बप्पांकडे तक्रार!

केज :-कायदेशीर रजिस्ट्री असूनही केवळ पैशांच्या हव्यासापोटी सर्वसामान्य खातेदारांना वेठीस धरणारे केजचे मंडळधिकारी भालेराव सध्या वादाच्या भोवऱ्यात सापडले आहेत. “पैसे द्या, नाहीतर फेर नामंजूर करू” अशी उघड भूमिका घेणाऱ्या या अधिकाऱ्याच्या मनमानी कारभाराविरुद्ध आता थेट बीडचे खासदार बजरंग बप्पा सोनवणे आणि जिल्हाधिकाऱ्यांकडे तक्रार करण्यात आली आहे. या ‘दलाल’ धार्जिण्या अधिकाऱ्याची तात्काळ चौकशी करून बदली करण्याची मागणी निवेदनाद्वारे करण्यात आली आहे.
नेमका प्रकार काय?
केज शहरातील सर्वे नंबर ४०१ मधील फेरफार मंजूर करण्यासाठी मंडळधिकारी भालेराव यांनी लाखो रुपयांची मागणी केल्याचा आरोप होत आहे. धक्कादायक बाब म्हणजे, पैसे दिले नाहीत म्हणून आधी कायदेशीर रजिस्ट्री असलेला फेरफार नामंजूर केला आणि जसे पैसे मिळाले तसा तोच फेर तत्काळ मंजूर केला. हा प्रकार म्हणजे ‘सरकारी खुर्चीवर बसून केलेली दरोडेखोरी’ असल्याची संतप्त प्रतिक्रिया जनतेतून उमटत आहे.
भालेराव यांची कार्यपद्धती: ‘आधी वसुली, मगच स्वाक्षरी’
तक्रारीनुसार, भालेराव यांची भ्रष्टाचाराची पद्धत अत्यंत नियोजनबद्ध आहे:
• DSE चा वापर वसुलीसाठी: ऑनलाईन फेरफार जसा मंडळधिकाऱ्याच्या डी.एस.ई. (Digital Signature) ला येतो, तसा भालेराव संबंधित खातेदाराचा शोध सुरू करतात.

•राजस्व अभियानात ‘हिशोब’ चुकता होणार?
येत्या १५ मे २०२६ (शुक्रवार) रोजी महसूल विभागाचे ‘राजस्व अभियान’ राबविण्यात येणार आहे. या अभियानादरम्यान भ्रष्टाचारात अव्वल असलेल्या या अधिकाऱ्याविरोधात शेतकरी आक्रमक पवित्रा घेण्याच्या तयारीत आहेत. जिल्हा प्रशासनाने याकडे दुर्लक्ष केल्यास मोठे आंदोलन उभे राहण्याची शक्यता वर्तवण्यात येत आहे.

• रातोरात फेर मंजूर: जर एखाद्या तक्रारीच्या फेरफारमध्ये दलालांचे हितसंबंध असतील, तर तक्रारदारांना कोणतीही नोटीस न देता रातोरात फेरफार मंजूर केले जातात.
• बेकायदेशीर तक्रारींना खतपाणी: पैशांच्या बदल्यात बेकायदेशीर तक्रारींना कायदेशीर मान्यता देण्याचे काम या कार्यालयात सुरू आहे.
खातेदारांचा संताप आणि खासदारांकडे धाव
लाखो रुपये घेऊनही महिना-महिना फेरफार प्रलंबित ठेवले जातात. भालेराव यांच्या या मनमानीला कंटाळून त्रस्त खातेदारांनी आता आक्रमक पवित्रा घेतला आहे. खासदार बजरंग बप्पा सोनवणे आणि जिल्हाधिकारी यांना दिलेल्या निवेदनात म्हटले आहे की, भालेराव हे केवळ दलालांचे हित जोपासत असून त्यांच्यामुळे शासनाची प्रतिमा मलीन होत आहे.
चौकशी आणि बदलीची टांगती तलवार
या गंभीर तक्रारीची दखल घेऊन जिल्हा प्रशासनाकडून चौकशीचे आदेश मिळण्याची शक्यता आहे. “भालेराव यांची तात्काळ बदली करून त्यांच्या कार्यकाळातील सर्व फेरफारांची सखोल चौकशी व्हावी,” अशी मागणी जोर धरत आहे. आता या भ्रष्ट अधिकाऱ्यावर प्रशासन काय कारवाई करते, याकडे संपूर्ण केज तालुक्याचे लक्ष लागले आहे.
“हा मंडळधिकारी आहे की जनतेला लुटणारा दरोडेखोर?” – अशा शब्दांत केजमधील संतप्त खातेदारांनी आपला रोष व्यक्त केला आहे.

पुढील अंकात भालेराव मंडळधिकारी यांनी बरेच  केलेले महाप्रताप