‘बोगस ट्रस्ट’चा पर्दाफाश! केज ग्रामस्थांचा संताप, मानाचा केज येथील चिचंपुरच्या मारुती मंदिरावर हक्क कोणाचा?

केज :-केज येथील चिंचपुर ग्रामदैवत आणि श्रद्धेचे स्थान असलेल्या ‘मानाचा मारुती’ मंदिराच्या विकासाला काही मोजक्या लोकांमुळे खीळ बसली आहे. गावातील ज्येष्ठ आणि तरुणांना विश्वासात न घेता, केवळ ६-७ लोकांनी रातोरात ‘बोगस ट्रस्ट’ स्थापन केल्याचा खळबळजनक आरोप ग्रामस्थांनी केला आहे. या निर्णयामुळे गावात संतापाची लाट असून, हा ट्रस्ट तत्काळ बरखास्त करून सर्वसमावेशक समिती स्थापन करण्याची मागणी जोर धरू लागली आहे.
नेमका प्रकार काय?
मिळालेल्या माहितीनुसार, चिंचपूर येथील मारुती मंदिर हे सरकारी गायरान जमिनीवर असून ते संपूर्ण गावाची सार्वजनिक मालमत्ता आहे. मात्र, गावातील काही मोजक्या व्यक्तींनी कोणालाही कल्पना न देता गुपचूप धर्मादाय आयुक्तांकडे नोंदणी करून वैयक्तिक मालकी असल्यासारखा कारभार सुरू केला आहे. “शासनाचे गायरान आणि सार्वजनिक मंदिर असताना काही लोक यावर वैयक्तिक अधिकार कसा काय गाजवू शकतात?” असा संतप्त सवाल ग्रामस्थांनी उपस्थित केला आहे.
ग्रामस्थांच्या प्रमुख मागण्या:
गावातील युवकांनी आणि ज्येष्ठ नागरिकांनी या ‘अजब’ निर्णयाला विरोध दर्शवत प्रशासनाकडे खालील मागण्या केल्या आहेत:
• बोगस ट्रस्ट रद्द करावा: मोजक्या लोकांच्या फायद्यासाठी केलेला हा ट्रस्ट बेकायदेशीर ठरवून तो रद्द करण्यात यावा.
• तहसीलदार केज यांची अध्यक्षपदी नियुक्ती: मंदिराचा कारभार पारदर्शक व्हावा यासाठी तहसीलदार, केज यांना पदसिद्ध अध्यक्ष म्हणून नियुक्त करावे.
• सर्वसमावेशक समिती: या ट्रस्टमध्ये गावातील प्रतिष्ठित व्यक्ती, शेजारील शेतकरी बांधव आणि तरुणांचा समावेश करून सर्वसमावेशक देवस्थान ट्रस्ट स्थापन करावा.
• आर्थिक पारदर्शकता: आजवर मंदिरात भाविकांनी अर्पण केलेल्या दानाची आणि खर्चाची सखोल चौकशी करून हिशोब सार्वजनिक करावा
“मंदिराचा विकास ही संपूर्ण गावाची भावना आहे. मात्र, काही लोक राजकारण करून विकासाला अडकाठी घालत आहेत. ग्रामस्थांना अंधारात ठेवून केलेला कोणताही निर्णय आम्हाला मान्य नाही. जर प्रशासनाने यात लक्ष घातले नाही, तर तीव्र आंदोलन छेडले जाईल.”
— ग्रामस्थ
आता या प्रकरणात प्रशासन काय भूमिका घेते आणि चिंचपूरच्या मारुती मंदिराला ‘बोगस’ कारभारातून मुक्ती मिळते का, याकडे सर्वांचे लक्ष लागले आहे