राज्य सरकारी कर्मचारी आणि शिक्षकांचे रणशिंग; २५ एप्रिलपासून बेमुदत संपाचा इशारा!

केज:-महाराष्ट्र राज्य सरकारी कर्मचारी मध्यवर्ती संघटनेने प्रलंबित मागण्यांसाठी आक्रमक पवित्रा घेतला असून, येत्या २५ एप्रिल २०२६ पासून राज्यभरातील १७ लाख सरकारी कर्मचारी आणि शिक्षक बेमुदत संपावर जाणार आहेत. यासंदर्भातील अधिकृत नोटीस संघटनेने मुख्यमंत्री कार्यालयाला सादर केली आहे.
मागण्यांकडे सरकारचे दुर्लक्ष?
गेल्या वर्षभरापासून राज्य सरकारी कर्मचारी आणि शिक्षक आपल्या न्याय्य मागण्यांसाठी लढा देत आहेत. पत्रात नमूद केल्यानुसार, युती शासन सत्तेवर आल्यानंतर मागण्यांबाबत ठोस निर्णय होईल अशी कर्मचाऱ्यांना अपेक्षा होती. मात्र, वारंवार पाठपुरावा करूनही सरकारकडून केवळ आश्वासनं मिळाली असून अद्याप कोणतीही सकारात्मक कृती झालेली नाही, असा आरोप संघटनेने केला आहे.
जुनी पेन्शन आणि ‘सुधारित राष्ट्रीय निवृत्ती वेतन’ योजनेचा पेच
माजी मुख्यमंत्री एकनाथ शिंदे यांच्या कार्यकाळात ‘सुधारित राष्ट्रीय निवृत्ती वेतन योजना’ जाहीर करून कर्मचाऱ्यांना दिलासा देण्यात आला होता. मात्र, या योजनेच्या अंमलबजावणीसाठी आवश्यक असलेले नियम, अटी किंवा अधिसूचना अद्याप जारी करण्यात आलेल्या नाहीत. १ मार्च २०२४ पासून ही योजना लागू होणे अपेक्षित असताना, अद्याप शासन निर्णय न निघाल्यामुळे निवृत्त झालेल्या कर्मचाऱ्यांच्या पेन्शनचा प्रश्न अधांतरी आहे.
आंदोलनांची मालिका निष्फळ
संपाचा निर्णय घेण्यापूर्वी संघटनेने लोकशाही मार्गाने अनेक आंदोलने केली होती:
• मार्च २०२५: राज्यव्यापी धरणे सत्याग्रह.
• मे २०२५: दोन तासांचे ‘वॉक आऊट’ आंदोलन.
• नोव्हेंबर २०२५: भोजनाच्या सुट्टीत निदर्शने.
• डिसेंबर २०२५: शाळा बंद आंदोलन आणि नागपूर हिवाळी अधिवेशनासमोर साखळी उपोषण.
मुख्य सचिवांनी १५ दिवसांत चर्चा करण्याचे आश्वासन दिल्याने डिसेंबरमधील उपोषण स्थगित करण्यात आले होते. मात्र, तीन महिने उलटूनही चर्चेसाठी बोलावणे न आल्याने कर्मचाऱ्यांमध्ये प्रचंड संताप व्यक्त होत आहे.
प्रशासकीय कोंडी होण्याची शक्यता
२५ एप्रिलपासून सुरू होणाऱ्या या बेमुदत संपामुळे राज्यातील शासकीय कार्यालये, शैक्षणिक संस्था आणि इतर अत्यावश्यक सेवांवर मोठा परिणाम होण्याची शक्यता आहे. “सरकार संवेदनशील असल्याचे सांगते, मात्र कृतीतून ते दिसत नाही,” अशी भावना कर्मचारी व्यक्त करत आहेत. आता सरकार यावर काय तोडगा काढते, याकडे सर्वांचे लक्ष लागले आहे