केजच्या जुन्या नेत्यांनी कार्यकर्त्यांच्या दोन पिढ्या गाडल्या! केजमध्ये घराणेशाहीचा विळखा; रस्ते, पाणी, घरकुलं गिळणाऱ्यांना यावेळी घरी बसवा

‘हेच कारभारी केज शहराच्या दुरावस्थेला जबाबदार’; 

केज:-देशाला स्वातंत्र्य मिळून ७८ वर्षे, ८ महिने आणि ५ दिवस उलटले तरी केज शहराचे नशीब बदलताना दिसत नाही. आगामी नगरपंचायत निवडणुकीचे बिगुल वाजायला अजून एक वर्षाचा कालावधी शिल्लक असतानाच, शहरातील राजकीय आखाड्यात ‘रंगीत तालीम’ सुरू झाली आहे. मात्र, या निवडणुकीतही माजी सरपंच, माजी नगराध्यक्ष आणि जुन्याच नगरसेवकांचा बोलबाला असून, नव्या दमाच्या कार्यकर्त्यांना पद्धतशीरपणे बाजूला सारले जात असल्याची चर्चा आता जोर धरू लागली आहे.

दोन पिढ्यांचे नेतृत्व संपवले?

केजच्या राजकारणात सध्या तीन प्रमुख गट सक्रिय आहेत. आश्चर्याची बाब म्हणजे, या गटांनी गेल्या अनेक वर्षांपासून नवीन कार्यकर्त्यांची फळीच निर्माण होऊ दिली नाही. सत्तेची खुर्ची आपल्याच वर्तुळात राहावी यासाठी जुन्या नेत्यांनी दोन पिढ्यांचे नेतृत्व संपवल्याचा आरोप सामान्य जनतेतून होत आहे. निवडणुका आल्या की हे गट एकमेकांविरुद्ध शड्डू ठोकतात, मात्र निकाल लागताच आकड्यांचे गणित जुळवून सत्तेचा ‘सुखाचा संसार’ मांडतात, अशी खोचक टीका नागरिक करत आहेत.
विकासाचा ‘झेंडा’ फक्त नेत्यांच्याच घरात!
शहरातील मूलभूत प्रश्न आजही आ वासून उभे आहेत.

• पाणी पुरवठा: नियमित पाणी नाही.

• स्वच्छता: नाल्यांची दुरावस्था आणि शौचालयांचा अभाव.

• घरकुल: गरजूंच्या हक्काच्या घरांची प्रतीक्षा कायम.
सामान्य जनतेचे प्रश्न जिथल्या तिथेच आहेत, मात्र निवडून आलेल्या उमेदवारांचा वैयक्तिक विकास मात्र एखाद्या झेंड्यासारखा फडकताना दिसतो.
कोटींच्या उड्डाणामुळे भ्रष्टाचाराला फुटले धुमारे
गेल्या निवडणुकीत एका उमेदवाराला विजयी होण्यासाठी किमान ५० लाख रुपये खर्च करावे लागले होते. आता हा आकडा १ कोटींच्या पार जाण्याची शक्यता आहे. निवडणुकीत लावलेला हा ‘पैसा’ वसूल करण्यासाठी मग घरकुल घोटाळा, शौचालय निधी, नाली आणि पाईपलाईनच्या कामांत मोठ्या प्रमाणावर आर्थिक गैरव्यवहार केले जातात. “निवडणुकीत पैसे घेऊन मतदान केल्यामुळे मतदारांनाही या नेत्यांना जाब विचारता येत नाही,” ही खरी शोकांतिका आहे.
मतदारांनो, सावधान!
यावेळी नगराध्यक्षपद ‘ओपन’ (खुले) प्रवार्गासाठी सुटले आहे. त्यामुळे अनेक दिग्गजांनी आतापासूनच मोर्चेबांधणी सुरू केली आहे. मात्र, शहराचा विकास हवा असेल, तर उमेदवारांची पार्श्वभूमी, त्यांची काम करण्याची पद्धत आणि त्यांच्या संपत्तीचा स्रोत तपासूनच मतदान करण्याची वेळ आता आली आहे
केजच्या राजकारणातील हे ‘गटातटाचे’ नाटक फक्त स्वतःच्या फायद्यासाठी आहे की शहराच्या विकासासाठी, याचा विचार करण्याची जबाबदारी आता जागरूक मतदारांवर आहे. अन्यथा, पुन्हा पाच वर्ष ‘त्यांचा’ सुखाचा संसार आणि जनतेच्या नशिबी वनवास, हेच चित्र कायम राहील