माजी आमदार कै. बाबुराव आडसकर यांना मरणोत्तर ‘रोटरी भूषण पुरस्कार’

अंबाजोगाई: मराठवाड्याच्या राजकारणात आपल्या कर्तृत्वाने आणि रांगड्या व्यक्तिमत्त्वाने वेगळे स्थान निर्माण करणारे लोकनेते, माजी आमदार कै. बाबुराव आडसकर यांना या वर्षीचा मरणोत्तर ‘रोटरी भूषण पुरस्कार’ जाहीर करण्यात आला आहे. रोटरी क्लब ऑफ अंबाजोगाई सिटीच्या वतीने हा बहुमान दिला जाणार असून, रोटरीचे अध्यक्ष शकील शेख आणि सचिव राधेश्याम लोहिया यांनी अधिकृतपणे ही माहिती दिली. आगामी २६ जुलै (रविवार) रोजी सायंकाळी ५ वाजता हॉटेल परिचय, अंबाजोगाई येथे उपस्थित मान्यवरांच्या हस्ते आडसकर कुटुंबीयांचा सन्मान करण्यात येणार आहे.
शिक्षण आणि रोजगाराची गंगा घराघरात पोहोचवली
लोकनेते बाबुराव आडसकर यांनी केवळ सत्ताकारण न करता समाजकारण आणि ग्रामीण विकासाला नेहमीच प्राधान्य दिले. छत्रपती शिवाजी महाराज शिक्षण संस्था, आडस या संस्थेच्या माध्यमातून त्यांनी ग्रामीण भागात शिक्षणाचे मोठे जाळे निर्माण केले. या शिक्षण संस्थेच्या आणि अंबाजोगाई सहकारी साखर कारखान्याच्या माध्यमातून त्यांनी अनेक गावांमध्ये शाळा सुरू केल्या. ग्रामीण भागातील सर्वसामान्य कुटुंबातील मुलांना दर्जेदार शिक्षण मिळवून देण्यासोबतच, या दोन्ही संस्थांच्या माध्यमातून त्यांनी शेकडो बेरोजगार तरुणांना नोकरीची संधी उपलब्ध करून देऊन त्यांचे संसार उभे केले. त्यांच्या या दूरदृष्टीमुळे शेकडो कुटुंबांना रोजगाराचा मुख्य आधार मिळाला.
५० वर्षांचा ऐतिहासिक राजकीय प्रवास
केज तालुक्यातील आडस या गावचे सुपुत्र असलेल्या बाबुरावजींनी यशवंतराव चव्हाण यांच्या विचारधारेचा स्वीकार करून काँग्रेस पक्षात सक्रिय प्रवेश केला. १९६३ मध्ये केज पंचायत समितीचे सभापती म्हणून सुरू झालेला त्यांचा राजकीय प्रवास पुढील ५० वर्षे अविरतपणे सुरू राहिला. विधानसभा व विधानपरिषद सदस्यत्व (आमदार), महाराष्ट्र राज्य सहकारी बँक (शिखर बँक) संचालक, अंबाजोगाई सहकारी साखर कारखान्याचे अध्यक्ष अशी अनेक महत्त्वपूर्ण पदे त्यांनी मोठ्या दिमाखाने भूषविली.
जनसामान्यांचे वलय आणि ‘हाबाड्याचा’ धसका
आपल्या रांगड्या व्यक्तिमत्त्वाने आणि फर्ड्या भाषणाने मोठमोठ्या सभा गाजवणारे बाबुरावजी नेहमीच जनसामान्यांच्या गराड्यात असत. सामान्य माणूस केंद्रबिंदू मानून त्याचे काम करण्याची त्यांची प्रवृत्ती त्यांना लोकप्रिय बनवत गेली. त्यांच्या राजकीय डावपेचांचा आणि ‘हाबाड्याचा’ धसका जिल्ह्यातील मोठमोठ्या पुढाऱ्यांनी घेतला होता.
त्यांच्या याच ऐतिहासिक सामाजिक आणि राजकीय कार्याची दखल घेत रोटरी क्लबने त्यांना हा पुरस्कार जाहीर केला असून, या गौरव सोहळ्यास नागरिकांनी मोठ्या संख्येने उपस्थित राहावे, असे आवाहन रोटरीचे अध्यक्ष शकील शेख, सचिव राधेश्याम लोहिया, उपाध्यक्ष कल्याण काळे आणि पुरस्कार समितीचे समन्वयक अनंत लोमटे यांनी केले आहे.