बीडचे ‘केन्द्रस्थान’ केज: पावसापासून हत्यांपर्यंत केजच आघाडीवर!

बीड :- बीड जिल्ह्यात सध्या हवामानासोबतच राजकीय आणि सामाजिक वातावरणही चांगलेच तापलेले पाहायला मिळत आहे. जिल्ह्याच्या चालू मान्सून हंगामातील पर्जन्यमानाच्या अहवालानुसार केज तालुक्याने तब्बल २९३.० मिमी (५०.२%) पावसाची नोंद करत संपूर्ण जिल्ह्यात प्रथम क्रमांक पटकावला आहे. मात्र, दुसरीकडे केज तालुका केवळ पावसातच नाही, तर कायदा-सुव्यवस्थेच्या प्रश्नावर आणि आंदोलनांमध्येही तितकाच पुढे असल्याचे चित्र आहे. “बीड जिल्ह्यात पावसाने केज अव्वल, तर गुन्हेगारीतही नंबर वन! खूनांपासून मोर्च्यांपर्यंत केजच चर्चेत!” अशीच काहीशी अवस्था सध्या या तालुक्याची झाली आहे.
पावसाची हाफ सेंच्युरी: केज तालुका अव्वल!
महावेध पोर्टलच्या २२ जुलै २०२६ च्या शासकीय अहवालानुसार, बीड जिल्ह्याची एकूण सरासरी टक्केवारी ३२.१% झाली आहे. यामध्ये जिल्हभरातील ११ तालुक्यांपैकी केज तालुका ५० टक्क्यांचा टप्पा ओलांडणारा एकमेव तालुका ठरला आहे.
वार्षिक सरासरी पाऊस: ५८३.६ मिमी
आत्तापर्यंत झालेला एकूण पाऊस: २९३.० मिमी
पावसाची टक्केवारी: ५०.२% (जिल्ह्यात सर्वाधिक)
गेल्या २४ तासांतील पाऊस: १३.० मिमी
शेतीच्या दृष्टीने ही आकडेवारी केज तालुक्यातील बळीराजासाठी मोठा दिलासा देणारी आहे.
कडक कारवाया तरीही गुन्हेगारी कायम; खूनांपासून मोर्च्यांपर्यंत केजच पुढे!
एकीकडे पावसाच्या आकडेवारीत केज तालुक्याने बाजी मारली असताना, दुसरीकडे मात्र गुन्हेगारीच्या आकडेवारीने आणि राजकीय-सामाजिक घडामोडींनी तालुका चिंतेत सापडला आहे. तालुक्यात कायदा व सुव्यवस्था अबाधित राखण्यासाठी पोलिसांकडून कडक पावले उचलली जात आहेत. आजपर्यंत केज तालुक्यातील ७ सराईत गुन्हेगारांवर ‘झोपडपट्टी दादा’ (MPDA) कायद्याअंतर्गत कडक कारवाई करून त्यांची हर्सूल मध्यवर्ती कारागृहात रवानगी करण्यात आली आहे.
मात्र, प्रशासनाने एवढी मोठी कारवाई करूनही केज तालुक्यातील गुन्हेगारी कमी होण्याचे नाव घेत नाहीये. जिल्ह्यात घडणारे गंभीर गुन्हे, खून, दरोडे असोत किंवा अन्यायाविरोधात किंवा राजकीय हेतुने प्रेरीत धडकणारे मोर्चे असोत; केज तालुका नेहमीच केंद्रस्थानी राहत आहे. वारंवार निघणारे मोर्चे आणि गुन्हेगारीचे सत्र यामुळे पोलिसांच्या कडक कारवायांवरच आता प्रश्नचिन्ह उपस्थित होत असून तालुक्यात केजच्या या दुहेरी अव्वल स्थानाचीच जोरदार चर्चा सुरू आहे.
इतर तालुक्यांची स्थिती काय?
केज पाठोपाठ पाटोदा तालुक्यात ३९.६% (२१३.३ मिमी) आणि शिरूर कासारमध्ये ३३.१% (१७०.७ मिमी) पाऊस नोंदवला गेला आहे. मात्र, गेवराई (२१.८%) आणि वडवणी (२०.२%) हे तालुके अद्यापही मोठ्या पावसाच्या प्रतीक्षेत आहेत.
एकंदरीत, बीड जिल्ह्यात पावसाचा ‘हीरो’ ठरलेला केज तालुका, गुन्हेगारीवर एमपीडीए (MPDA) सारख्या कारवाया होऊनही वाढणारे गुन्हे आणि मोर्च्यांच्या हॉटस्पॉटमुळे सध्या संपूर्ण जिल्ह्याचे लक्ष वेधून घेत आहे.