“आदेश देणारे नामानिराळे, पाळणारे कोठडीत! केज घरकुल घोटाळ्याचा तपास की ‘बळीचा बकरा’ शोधण्याची मोहीम?

केज :-केज नगरपंचायतीमध्ये ‘प्रधानमंत्री आवास योजने’त (घरकुल) मोठा अपहार झाल्याचे समोर आले असून, याप्रकरणी नगरपंचायतीचे मुख्याधिकारी अजित गणपतराव डोपे यांच्या फिर्यादीवरून केज पोलीस ठाण्यात सहा जणांविरुद्ध गुन्हा दाखल करण्यात आला आहे. मात्र, या कारवाईमुळे शहरात उलटसुलट चर्चांना उधाण आले असून, मुख्य सूत्रधारांना सोडून केवळ १० टक्के कमिशन घेणाऱ्या कनिष्ठ कर्मचाऱ्यांवरच बडगा उगारल्याचा आरोप होत आहे.
नेमके प्रकरण काय?
मिळालेल्या माहितीनुसार, २० मे २०२१ ते ३१ जानेवारी २०२२ या कालावधीत नगरपंचायत केज अंतर्गत प्रधानमंत्री आवास योजनेसाठी प्राप्त झालेल्या शासकीय निधीचा अपहार करण्यात आला. संशयित आरोपींनी संगनमत करून शासकीय निधी हडप केला आणि या घोटाळ्याचा पुरावा नष्ट करण्याच्या उद्देशाने शासकीय दस्तऐवज देखील गहाळ केले. या गंभीर प्रकरणी भारतीय दंड विधानाच्या कलम ४०९, ४२०, २०१, २०४ आणि ३४ अन्वये गुन्हा दाखल करण्यात आला आहे.
गुन्हा दाखल झालेले आरोपी:
१) मिलींद सावंत (वय ६०, रा. मुंबई)
२) श्री. असद इसाकोद्दीन खतीब (वय ५८, रा. केज)
३) श्री. लक्ष्मण मारोती जगताप (वय ६६, रा. बीड)
४) श्री. भास्कर एकनाथ ससाणे (वय ५९, रा. केज)
५) श्री. भीमराव शामराव मस्के (वय ५४, रा. केज)
६) श्री. बासेद वलीयोद्दीन काझी (वय ४८, रा. केज)
चर्चेचा विषय: सूत्रधार मोकाटच?
या कारवाईनंतर केज शहरात मोठ्या प्रमाणावर नाराजी आणि संशय व्यक्त केला जात आहे. सूत्रांनी दिलेल्या माहितीनुसार, या घरकुल घोटाळ्याचे मुख्य धागेदोरे हे शहरातील काही बड्या धेंडांशी संबंधित आहेत. मात्र, पोलिसांनी ज्यांच्यावर गुन्हे दाखल केले आहेत, त्यामध्ये बहुतांश कनिष्ठ श्रेणीतील कर्मचारी (व्हाल्मन व इतर) आहेत.
“ज्यांनी कोट्यवधींच्या निधीवर डल्ला मारला आणि जे या संपूर्ण प्रकरणाचे मास्टरमाइंड आहेत, त्यांच्यावर अद्याप कोणतीही कारवाई झालेली नाही. केवळ १० टक्के कमिशन घेणाऱ्या किंवा आदेशाचे पालन करणाऱ्या कर्मचाऱ्यांना बळीचा बकरा बनवले जात आहे का?” असा सवाल आता नागरिक उपस्थित करत आहेत.
पुढील तपास सुरू
या प्रकरणाचा तपास सहाय्यक पोलीस निरीक्षक मांजरेमे करत असून, पोलीस निरीक्षक उनवणे यांच्या मार्गदर्शनाखाली पुढील कार्यवाही सुरू आहे. गहाळ झालेले दस्तऐवज आणि निधीचा नेमका मार्ग शोधण्याचे मोठे आव्हान पोलिसांसमोर आहे. आता पोलीस या ‘लहान माशां’कडून मुख्य ‘सुत्रधारां’पर्यंत पोहोचणार का, याकडे संपूर्ण जिल्ह्याचे लक्ष लागले आहे