वर्षातून एकदाच काम, तरीही अधिकारी गायब; ‘निर्ढावलेल्या’ कृषी अधिकाऱ्यांना आता थेट झोडपून काढले पाहिजे!

शेतकऱ्यांचा संयम सुटला; केज कृषी कार्यालयाच्या माजोरड्या कारभारावर तालुक्यात तीव्र संताप

केज :-वर्षभर एसी केबिनमध्ये बसून सुस्त पडलेल्या केज तालुका कृषी कार्यालयाला वर्षातून एकदाच काय ती पेरणीच्या वेळी ‘कामाची’ आठवण येते. पण दुर्दैवाने, त्याच ऐन पेरणीच्या नऊ दिवसांतही इथले अधिकारी आणि कर्मचारी कर्तव्यावर हजर राहण्याऐवजी गायब राहत असतील, तर यापेक्षा मोठे दुर्दैव ते कोणते? शेतकऱ्यांच्या जीवावर जगणाऱ्या आणि ऐन संकटाच्या काळात बळीराजाला वाऱ्यावर सोडणाऱ्या अशा निर्ढावलेल्या आणि माजोरड्या अधिकाऱ्यांना आता शाई फासून सरळ झोडपूनच काढले पाहिजे, असा संतप्त सूर आता केज तालुक्यातील शेतकऱ्यांमधून उमटू लागला आहे.

तहसीलदारांचा छापा ठरला नावापुरता; ‘साहेब’ अजूनही बेपत्ताच!

काल सोमवारी (दि. ८) केजच्या तहसीलदारांनी भरदुपारी या कार्यालयावर अचानक छापा टाकला, तेव्हा कृषी कार्यालयाचे सर्व अधिकारी आणि कर्मचारी गायब असल्याचे समोर आले. मुख्य तालुका कृषी अधिकारी श्री. पठाडे हे कोणतीही पूर्वकल्पना न देता, रजेचा अर्ज न देता कार्यालयातून पसार झाले आहेत. विशेष म्हणजे, त्यांनी आपल्या पदाचा कारभार दुसऱ्या कोणाकडे सोपवला देखील नाही. “शासनाचा पगार खायचा आणि शेतकऱ्यांच्या गरजेच्या वेळी पळून जायचे,” ही पठाडे आणि त्यांच्या टोळीची प्रवृत्ती आता शेतकऱ्यांच्या सहनशीलतेचा अंत पाहणारी ठरत आहे.
### जनतेचा इशारा: ‘आता विनंत्या संपल्या, गाठ शेतकऱ्यांच्या काठ्यांशी आहे!’
सध्या तालुक्यात सोयाबीन बियाणे आणि खतांचा प्रचंड तुटवडा आहे. शेतकरी टोकन घेऊन दोन-दोन दिवस खाजगी दुकानदारांच्या दारात उन्हातानात ताटकळत उभा आहे. खाजगी दुकानदार बियाण्यांचा काळाबाजार करून शेतकऱ्यांची लूट करत आहेत आणि हे थांबवण्याची ज्यांची जबाबदारी आहे, ते कृषी अधिकारी एसी रूममध्ये लपून बसले आहेत. या ढिम्म प्रशासनाविरोधात काल भाजप डॉक्टर सेलचे जिल्हाध्यक्ष डॉक्टर वासुदेव नेहरकर यांच्या नेतृत्वाखाली तीव्र आंदोलन करण्यात आले.

“आम्ही वर्षभर घाम गाळतो तेव्हा या साहेबांना पगार मिळतो. पेरणीच्या तोंडावर बियाणे मिळत नसेल आणि हे अधिकारी पळून जात असतील, तर पुढच्या वेळी हे अधिकारी समोर दिसताच यांना खुर्चीला बांधून झोडपून काढल्याशिवाय शेतकरी शांत बसणार नाही!” > – केज तालुक्यातील आक्रमक शेतकरी बांधव.

सत्ताधारीही हतबल, कृषी विभागाची गुंडगिरी कधी थांबणार?

कृषी कार्यालयाच्या या अत्यंत हलकट आणि बेजबाबदार कारभारामुळे केवळ सामान्य शेतकरीच नाही, तर चक्क सत्ताधारी पक्षाचे पदाधिकारी, उपसभापती आणि तालुकाध्यक्ष यांनाही काल कार्यालयाच्या दारात ठिय्या मांडून बसावे लागले. तहसीलदारांनी पंचनामा तर केला आहे, पण केवळ कागदी घोडे नाचवून भागणार नाही.
ऐन पेरणीच्या वेळी शेतकऱ्यांच्या जखमेवर मीठ चोळणाऱ्या या कामचोर आणि निर्ढावलेल्या अधिकाऱ्यांचे तात्काळ निलंबन करून यांना रस्त्यावर आणले पाहिजे, अन्यथा केज तालुका कृषी कार्यालयाची तोडफोड करून अधिकाऱ्यांना अद्दल घडवण्याचा इशारा आता शेतकऱ्यांनी दिला आहे.