सोनिजवळ्यात दिगांबर ससाणे यांच्या निधनाने सुखाचा संसार पोरका; तातडीने निधी देण्याची ऋषीकेशभैय्या आडसकरांची प्रशासनाला मदतीची मागणी

केज:-दिनांक २३ मे रोजी केज तालुक्यातील युसुफवडगाव आणि आडस मंडळाला अवकाळी पाऊस आणि जाहीर चक्रीवादळाने मोठा तडाखा दिला. या नैसर्गिक आपत्तीत झालेल्या शेतीपिकांच्या व मालमत्तेच्या नुकसानीचे प्रशासनाने तात्काळ पंचनामे करावेत, तसेच वीज कोसळून मृत झालेल्या शेतकऱ्याच्या कुटुंबाला तातडीने शासकीय मदत मिळावी, या मागणीसाठी अंबाजोगाई सहकारी साखर कारखान्याचे संचालक तथा केज पंचायत समितीचे माजी उपसभापती, युवा नेते मा. ऋषीकेशभैय्या आडसकर यांच्या नेतृत्वाखाली केजच्या तहसीलदार साहेबांना निवेदन देण्यात आले.
सोनिजवळा येथील मृत शेतकऱ्याच्या कुटुंबाला मदतीची मागणी
या वादळी पावसात मौजे सोनिजवळा येथील शेतकरी कै. दिगांबर ससाणे यांचा अंगावर वीज कोसळून होरपळून दुर्दैवी मृत्यू झाला. या घटने बद्दल तीव्र दुःख व्यक्त करत, प्रशासनाने शासनाच्या आपत्ती व्यवस्थापन निधीतून त्यांच्या कुटुंबियांना तात्काळ आर्थिक मदत मंजूर करावी, अशी आग्रही मागणी या निवेदनाद्वारे करण्यात आली.
वीज वितरण व्यवस्थेची तातडीने दुरुस्ती करा
वादळामुळे ग्रामीण भागात अनेक ठिकाणी विजेचे पोल आणि तारा तुटून पडल्या आहेत. यामुळे नागरिकांच्या व जनावरांच्या जीविताला मोठा धोका निर्माण झाला आहे. संबधित वीज वितरण कंपनीच्या (महावितरण) अधिकाऱ्यांना तात्काळ सूचना देऊन गावागावांतील हे पोल आणि तारा दुरुस्त कराव्यात व वीज पुरवठा सुरळीत करावा, अशी मागणीही निवेदनात करण्यात आली आहे.
प्रमुख पदाधिकाऱ्यांची उपस्थिती
हे निवेदन देताना केज कृषी उत्पन्न बाजार समितीचे सभापती श्री. अंकुशराव इंगळे, युवा नेते मा. रणजितदादा आडसकर, राष्ट्रवादी काँग्रेस पक्षाचे तालुकाध्यक्ष श्री. अमर पाटील, युवक अध्यक्ष श्री. शिवदास थळकरी, ओ.बी.सी. सेलचे तालुकाध्यक्ष श्री. गोविंदराव ससाणे, बाजार समितीचे संचालक तथा सरपंच श्री. कैलास पाटील, श्री. सुशिलभैय्या अंधारे, श्री. कदम यांच्यासह परिसरातील नागरिक व कार्यकर्ते मोठ्या संख्येने उपस्थित होते.
प्रशासनाने यावर तात्काळ पावले उचलून शेतकऱ्यांना व बाधितांना दिलासा द्यावा, अशी अपेक्षा यावेळी उपस्थित नेत्यांनी व्यक्त केली.