नालासोपारा, बदलापूर, तळेगाव ते लातूर असा शैक्षणिक प्रवास; भाग्यश्री गोविंद ससाणेची निट परिक्षेमध्ये ५८० गुणांसह शासकीय MBBS साठी निवड

निट परीक्षेत कु. भाग्यश्री गोविंद ससाणेची उत्तुंग भरारी; सोलापूरच्या शासकीय वैद्यकीय महाविद्यालयात MBBS साठी निवड

लातूर / विशेष वृत्त :

वैद्यकीय प्रवेशासाठी घेण्यात येणाऱ्या अत्यंत प्रतिष्ठेच्या ‘नीट’ परीक्षेत कु. भाग्यश्री गोविंद ससाणे हिने ५८० गुणांची उत्तुंग भरारी घेत दैदीप्यमान यश संपादन केले आहे. तिच्या या घवघवीत यशामुळे तिची डॉ. व्ही. एम. शासकीय वैद्यकीय महाविद्यालय, सोलापूर येथे शासकीय कोट्यातून MBBS शिक्षणासाठी निवड झाली आहे.

भाग्यश्रीच्या या यशामागे तिची जिद्द, अभ्यासातील सातत्य आणि विविध शाळा-महाविद्यालयांमधून मिळालेल्या दर्जेदार शिक्षणाचा मोठा वाटा आहे.

प्राथमिक शिक्षणापासून ते यशाच्या शिखरापर्यंतचा प्रवास :

भाग्यश्रीचा शैक्षणिक प्रवास विविध शहरांतून घडला आहे:

इयत्ता १ ली ते २ री : राजीव गांधी शाळा, नालासोपारा (पश्चिम), ता. वसई, जि. ठाणे

इयत्ता ३ री ते ५ वी : के.बी.एल. शाळा, बदलापूर, ता. अंबरनाथ, जि. ठाणे
इयत्ता ६ वी ते ९ वी : परांजपे विद्या मंदिर, तळेगाव दाभाडे, ता. मावळ, जि. पुणे
इयत्ता १० वी : सरस्वती शाळा, लातूर
इयत्ता ११ वी व १२ वी : जयक्रांती कॉलेज, लातूर
निट मार्गदर्शन : विद्या आराधना अकॅडमी, लातूर
भाग्यश्रीने सुरुवातीपासूनच अभ्यासात चिकाटी राखत प्रत्येक टप्प्यावर उत्तम कामगिरी केली. ११ वी व १२ वीत जयक्रांती कॉलेजमध्ये शिक्षण घेत असताना तिने विद्या आराधना अकॅडमी, लातूर येथून नीट परीक्षेचे विशेष मार्गदर्शन घेतले. अकॅडमीतील शिक्षकांचे अचूक नियोजन, शंकांचे वेळेवर निरसन आणि भाग्यश्रीची कठोर मेहनत याच्या जोरावर तिने पहिल्याच प्रयत्नात ५८० गुणांचा टप्पा पार करून शासकीय वैद्यकीय महाविद्यालयात प्रवेश मिळवला.
तिच्या या यशाबद्दल तिचे पालक आई  जान्हवी वडिल गोविंद ससाणे, सर्व शाळा-महाविद्यालयांतील शिक्षक, विद्या आराधना अकॅडमीचे संचालक व शिक्षकवृंद, नातेवाईक आणि मित्रपरिवाराकडून तिचे मनःपूर्वक अभिनंदन करण्यात येत असून तिच्या भावी वैद्यकीय कारकिर्दीस शुभेच्छा दिल्या जात आहेत.